Nga cuaikhat an kan pekmi nih sur an kan chuhmi philhter hlah seh
Fianternak van tuah hmasa ta ning—kan Chin Media cheukhat le mipi tam nawn nih tutan van lawng a ttummi hi Laitlang ah a voikhatnak a si tiin an tialmi ka hmuh len i hihi a palhmi a si. Paletwa airport ah kum 1970s in 1980s karlak ah kum zeimawzat a vanlawng a rak tum i voi tam a rak ichok len cang ko. Twin Otter timi a hmemi pawl si i Canada chuak a si an ti.
A zeisi hmanh ah, Surbung Airport kan hun ngeihmi cu lunglawmh lo awk a tha lo. Hi vanlawng bual kan ngeih khawh nakding caah Rampi cozah he hnatlaknak a kan lakpiaktu CNF siseh, Hluttaw ah biahren a chuah khawhnak ding a kan chimrelpiaktu Chin party MP a simi Pi Za Tlem le Pu Zung Hlei Thang (cu lioah Pu ZHT hi Chin party a rak si rih) an cungah siseh, Cun a taktak tiantuan tikah budget a nuar nakhnga lo le atu bantuk in fekfuan le rianrang tein limlawh a si khawh nakhnga tuanvo a kan lakpiaktu NLD cozah in Vice President Pu Van Thio le Pu Lian Luai(CM) hruaimi Chin State cozah an cungah kan lung ai lawm khun.
Khatlei ah kan philh lo ding a simi tu cu, hihi mipi(rampi) phaisa in tuahmi a si. State budget and project a si ko. Myanmar ram ah airport 69 nak a si an ti. Hawi neih ballomi si loin hawi hnu deng i tuahpiakmi a si tinak. Hei chap ko ahcun, aa cit tu ding zong hi a tamdeuh cu Chin kan si lem lailo cuh.
Cucaah cozah cungah ilawmh tuk lem awk a si lo. Tuan tein an kan tuahpiak lomi hmanh kha kan thinhan dam rih lo ding khi a si lehlam.
Nga cuai khat an kan pekmi ruangah kan ilawm, kan lung awi i kan sur an kan chuhmi cungah lungfah awk kan philh sual ahcun lohlak vaa kan hrawng sual lai!
Miphun mahte khuakhannak/federal kan ngah hlan lo kan lung thi hlah seh! Cite liah luklak men in kan awr-vuai in lungngam hlah seh!
Source: Salai Ceu Bik Thawng
