SAC Ralkap Nih Nawlngeihnak An Lak Hnu In Ralzam 2 Million Deng An Um.
===================
December 28, 2022
SAC Ralkap nih nawlngeihnak an lak hnu kum 2 a tling hlan ram chung hriamtlai enteinak ruang ah ralzaam 2 million tiang an um tiah ISP sin in theih asi.
Ralkap nih uknak an lak 2021 February in a tu December 14 tiang hriamtlai entainak ruang ah Myanmar ram chung ralzaam 1,912,769 tiang an um tiah ISP – Myanmar nih an langhter.
SAC Ralkap nih uknak an lak hlan ah ralzaam 479,200 an um. Cun a tu ah ralzaam 2 million deng an karh ii ralzaam chung in 1.3 Million leng hi 2022 chung ah an karh mi asi.
Atu cazin an lak ning ah ralzaam chung in Sagaing peng hi ralzaam Ting 8 leng an i tel tiah ISP – Myanmar nih an langhter. Sagaing peng hi SAC Ralkap nih uknak an lak hnu in ralzaam an karh bik nak peng a si tiah ISP – Myanmar nih an chim.
Sagaing Peng hi kahdohnak leng in SAC Ralkap nih rallam an sial ruang ah biakinn tel in umnak inn le eidin an chiah nak inn pawl tiang mei an kangh ruang ah khuami pawl an zaam hi a si.
Tu thil sining ah Sagaing Peng minung an dih lak in 15 percent hi (790000) ralzaam dir hmun an phan tiah ISD- Myanmar nih an langhter.
Kachin ramkulh, Rakhine ramkulh le Chin ramkulh Palewah peng zong ah SAC Ralkap nih uknak an lak hlan kahdohnak ruang ah ralzaam cu an um ii uknak an lak hnu zong kahdohnak ruang ah ralzaam an karh tiah theih asi.
Atu Rakhine ah SAC Ralkap le AA cu kaphnih lungtlingnak in kahdohnak cu an dai ko nanin ralzaam pawl an umnak hmun ah an kir rih lo.
Uknak lak hlan le uknak lak hnu zong ah ramleng ralzaam zong 1 million deng an um tiah UNOCHR tel in ramchung ram leng committee nih an chim.
Atu Myanmar – Thai ramrii ralzaam sakhann ah a um mi ralzaam 99,190 an si ii India ram, Mizoram peng lei ah ralzaam 40000 leng an um tiah ISP – Myanmar nih cazin an langhter.
SAC Ralkap nih nawl ngeihnak an lak hnu in aluan cia November thla lai tiang ramchung kahdohnak voi 7800 leng a chuak tiah ISP – Myanmar nih an langhter chih.(Crd- DeltaNewsAgency )
