Chin ramkulh,Mindat peng chungah a luancia 2022 July thla in 2024 July thla karlak kum 2 chung ah SAC ralhraang nih van lei in bomb a thlak nak ruang ah tualchungmi minung 22 an thi cang i minung 74 nih hliam an tuar cang leng ah sianginn,Sizung le mizapi inn hna 137 a rawk cang tiah CHRO nih August 7 ah cathanh an chuah.
A luancia July 31 zanlei slm 6 tluk ah khan Mindat – Matupi lampi mengtung 20 i a um mi khuate hna ah SAC ralhraang nih vanlei in bomb a thlak caah tualchungmi pakhat hliam faak tuklo a tuar i inn pahnih arawk.July 30 zong ah khan Mindat he meng 5 tluk aa hlat nak i a um mi khuate pakhat ah SAC nih hriampi le Drone hna hmangin kahdohnak a tuah caah inn pakhat a rawk than.
Mindat peng chung ah SAC nih July thla ah vanlei in kahdohnak a tuah caah Bawng khuate um mi minung 1 a thi i 1 nih hliam a tuar leng ah phungki sianginn pakhat a rawk.
2024 April thla chung zong ah khan SAC nih Mindat peng chung ah hriampi le vanlei hna in kahdohnak a tuah ruangah CDF-Mindat ralkap 2 le tualchung mi 3 an rak thi i minung 31 nih hliam an rak tuar leng ah Womathu sizung,Khrihfa biainn 2,sianginn 1 le mizapi inn 24 a rak rawk.
