SAC Nih Sianginn On Mi ZPCC Le ZRA Nih An Cohlan!
SAC nih june 2 thok in Basic Education Sianginn on a timh mi kong ah Zomi Political Coordination Committee (ZPCC) le Zomi Revolution Army (ZRA) Eastern Command nih dirpinak le cohlannak cathanh cu May 30 ahkhan a chuah.
2022-2023 Cacawnkum ah KG in Grade 11 tiang cawn ding tiah NLD Cozah nih an rak thlen mi ning in cawn a si lai caah hmailei ah ram le miphun caah a ṭhathnem mi a si lai tiah an langhter.
Zogam (Zomi) ram chung siangngakchia hna nih hmailei i ram le miphun caah arfi nan si bang kum 2 chung ca nan cawn khawh ti lo mi sianginn an van on ṭhan caah Sianginn kai lo in um hrimhrim hlah uh, nan thiamnak dihlak chuah in i zuam chin ko uh tiah forhfialnak zong an langhter chih.
Cu lawng siloin mizei bantuk le zeibantuk phu hmanh nih Zogam ramchung ah Sianginn hrawh le kah lo ding, Cachimtu (saya/ma te) le Ngandamnak lei rianṭuantu le Cozah rianṭuantu hna ṭhihphaih le hrocer lo ding in kan in theihter hna. Cu bantuk a tuahtu phu le minung cu a herh ning in hmalak an si lai i a herh ahcun cozah he ṭangṭi in hma kan lak lai tiah an langhter.
