SAC Ralhraang hna nih Myanmar ram chung ummi Pa kum 18-35kar le Nu kum 18-27 kar paoh paoh ralkap ah luh viar ding timi nawl cu nizan February 10 ah khan a chuah.hi kong he pehtlai in SAC nawl chuah mi ruangah dothlennak ralkap thazaang a thawng chin lai tiah Chin mi ramkhel kong a thei hngal mi cheukhat nih an chim.
A Lam kip in a sung cuahmah mi SAC ralhraang hna nih a tlawm bik kum 2 tal ralkap rian tuanding timi nawl an chuah mi cu mino tampi nih an duh lai lo a fiang.hram hram in ralkap rian lut ter le training pek ti bantuk an tuah ah cun SAC caah a tha lai lo i dothlennak ralkap thazaang tu aa chap lai tiah Asho Chin in ramkhel lei tuaktaan mi pakhat nih a chim.
“Ralkap rian luh viar ding timi cu kalpi awk ah a har ngaingai.hramhram in thil an tuah ah cun meithal par cu anmah lei a hoih kho.kam khat lei ah mizapi inn mei a khaangtu,hramhram in mi a that tu SAC chungtel si ding a duh lo mi mino hna cu dothlennak ralkap sinah an i fonh kho” tiah a chim.
Dothlennak kum 3 chung ah chin ramkulh chung um SAC sakhaan le palek sakhaan 36 cu dothlennak ralkap hna nih an laak cang i chin ram chung zatuak ah 75% cu dothlengtu kut chung a phan.Chin ramkulh chung khuapi 9 zong an laak cang.
“Kan khua ah SAC ralkap pakhat hmanh an um tilo,khuami hna hnangam tein an tlawngleng kho cang,kahdohnak zong a um tilo i ukhruainak,humhimnak he aa pehtlaimi vialte Chin hriamtlai kut a phan dih cang” tiah Lailenpi khuami pakhat nih Zalen ah a chim.
A tu i khuapi chung a ummi mino hna cu chungkhar herhhai ruang ah a um mi an si hna.SAC nih ralkap training pek ding timi cu a fawi mi thil a si lo tiah Falam lei ramkhel kong dothlat tu pakhat nih a chim ve.
“SAC nih mithar ka khomh lai a ti zong ah Chin ram ah cun a fawi lai lo,raltuk caan i bawmtu ka thlah lai a ti hmanh ah vulei lei in a thlah kho ti lo,hi nawl an chuah mi hi Chin ram ah zeibantuk hmanh in hma an laa kho lai lo” tiah a chim.
SAC nih ralkap rian luh hrimhrim ding a ti mi cu hram hram in a kalpi si cun khua chung ummi mino tampi cu SAC chung luh nak cun dothlennak ralkap si an duh deuh lai cu a fiang mi a si.
