Magway ramthen,Pakkoku hrambunh SAC division 101 in ralhraang thazaang 300 tluk,Hriamnam le riahcaw hna a phor mi ralhraang mawtaw 80 tluk cu a luancia September 28 khan Chin ramkulh lei kai hram an rak i thawk i a tu ah KyaukHtu le Pauk kar an phan tiah theih a si.
Cu ralhraang mawtaw thluan hna cu Chin ramkulh Matupi le Mindat lei panh in a rak kai mi an si tiin thawng a chuak nain micheu nih Magway ramthen, Gangaw le Htilin lei ah hriamnam le riahcaw chanh ding in a kai mi an si tiin a chim mi zong an um ve.
“A tu lio te cu Mindat ah kahdohnak lian a chuak lo i Gangaw peng chung ah kahdoh nak fak ngai in a chuah caah Gangaw peng le Htilin peng lei ah an kai te men lai tiin ka ruahdomh. Cu ti si loin Mindat,Matupi lei an rak kai ah cun a fiang mi cu kaphnih kar kahdoh nak fak piin a chuak hrim lai,CDF Mindat nih timhlamh cia nak zong fakpiin kan tuah i an tuar fak ko lai ” tiah CDF Mindat in Salai Mindat nih a chim.
A tutan a rak kai cuahmah mi ralhraang mawtaw thluan khamnak ding caah September 30 ah le October 3 ah Pakkoku le Mindat kar i a ummi Ungdaw hleidonh pi cu voi hnih tiang bomb in an rak puah hnawh cang.
