Kalaymyo peng Letpanchaung khua ah nihin zinglei ah SAC ralkap nih hriamngan an kah ruang ah tualchung mi 7 hliam an tuar i kum 9 tluk pa ngakchia a thi tiah theih a si.
Nihin January 3, zinglei suimilam 9:00 hrawng ah Letpanchaung khuachung ah SAC ralkap nih hriam ngan voihnih an kah caah tualchung mi 7 an i hliam, kum 9 tluk a simi Joseph Malsawmhlua cu a hliamhma a fah ngai ruang ah chun suimilam 12:30 hrawng ah a nunnak a liam, tiah theih a si.
Joseph Malsawmhlua cu a unau pawl he hringtu a pa vok inn sak an bawmh lioah an pawngkam ah hriamngan a tlak ruang ah hliamhma fak ngai a put hnu ah a nunnak a liam i midang hliampu mi hna zong Kalaymyo siizungpi ah an thlopbul hna lio a si, tiah theih a si.
A luancia November thla chung zong ah SAC kah mi hriamngan ruang ah Letpanchaung khuami 4 nunnak a liam cang i 10 leng hliam an tuar tiah theih a si.
