Aluancia October 8 ah khan Russia President Putin kum 72 a tlin ni lawmh nak caah tiin Ukraine ralkap nih American sinin an hmuh mi ATACMS timi hriampi in Crimea hmunram i a um mi Russia tialhkho (oil) khawn nak hmun lianbik pi cu an kah i ni 4 chung bak hmih khawh a si lo i a kaang viar .
A tu bantuk in ralkong ah a biapi taktak mi hmun Ukraine lei nih an kah khawh mi kong he pehtlai in Ukraine lei ah thawngpang a pe tu tiah ruahmi pakhat cu Russia cozah lei mi dothlat tu phu FSB nih an tlaih i biahal nak an tuah cuahmah ve.
A tubantuk in Russia ram chung hmunram kong he pehtlai in Ukraine sinah thawngpang a pek nak a ruang cu Ukraine ralkap hna nih an ruahdomh in Russia ramchung ah missle an kah lengmang i tualchungmi a thi mi an tamtuk mi ngol ter a duh ruang ah target tha te an kah khawh dingin thawng a rak pek hna hi a si.
Crimea hmunram ah a um mi Russia ralkap hna caah a bik in tialhkho (oil) an laak nak hmun pi Ukraine nih an kah ruangah a mei hmit kho lo in ni 4 chung an zoh sawh sawh ko mi nih Putin lung a kuai ter ngaingai.
A tu bantuk in tialhkho (oil) an khawn nak hmunpi an kah hlan nitlawmpal zong ah khan Rusiia ram Krasnodar hmunram ah a um mi Russia cozah nih pound 16 million man drone an chiah nak hmunpi cu Ukraine ralkap nih an rak kah caah a chung um Drone vial te a rak rawk fawn.
