Chin ramkulh,Hakha khualipi laak khawh nak dingah kalpi cuahmah mi Rung Operation thla (7) chungah SAC ralhraang 30 tluk le an lei ttang minung 10 fim hlawm an si tiah theih a si.
Rung Operation cu dothnih in kalpi a si i a dohtkhat nak cu SAC minung le an hriamnam hna hrawhpiak ding a si.
“Hakha khuapi chung i a um mi pengkulh zung le district zung hna rian an tuan khawh lo nak ding hi kan i tinh mi ah aa tel,cu caah pei Vuanci hna zong kan va kah hna kha.a dang vuanci pawl, SAC tuah hnik mi Election ah luh aa tim mi pawl,cun zipeng le a dang SAC kuttang bawi pawl hna zong kan target an si hna.cu cu Rung Operation i a dotkhat nak a si.” tiah CDF-Hakha chimphuan nak nawl ngeitu nih Khonumthung ah a chim.
Rung Operation thla 7 chungah SAC ralhraang le CDF-Hakha karah kahdohnak voi 21 a chuak i Palik le SAC ralhraang minung 30 fim hlawm an si i meithal zun 6 laak a si leng ah SAC nih a kalpi mi ukhruainak ah aa teltum mi minung 10 zong fimhlawm an si.
Rung Operation cu Shanram chaklei unau phu thum nih an rak kalpi mi 1027 Opertion an thok in thla khat a tlin ni 1127 ah rak kalpi a si ve i a dot khat nak ah SAC hna harnak an ton dingin kan tuah khawh hna tiah an chim.
“SAC ralhraang riantuannak tam ngai ah harnak kan pek khawh hna,Non-CDM an si ah midang ah si ah harnak an tong ngai ko,kan rian kan hlawh a tling ngai” tiah CDF-Hakha president nih a chim.
Rung Operation i a dot hnih nak ah cun Chinland Council ralkap bu hna he ibawm in Hakha khuapi laak kahdohnak kalpi a si te lai tiah theih a si.
A tu ah CDF-Hakha nih hin Hakha peng chung zatuak ah 70% an laak khawh cang i 30% lawng SAC nih an tlaih khawh.cuti a taangmi 30% laak khawh nak dingah hriamnam hna i khawn cuahmah a si i mizapi nih ttanpi cio dingin nawlnak zong an tuah.
