Portugy le Juventus hmaikal Christiano Ronaldo cu COVID-19 zawtnak positive a si tiah Portuguese Football Federation nih nizaan (October 13) ahkhan thanhca an chuah.
An cathanh chungah Ronaldo cu zawtnak hmelchunh lang loin positive a si. A pum a dam ko tiah an thanh chih. Tutan ah C.Ronado COVID-19 positive a si ca ah tuzaan ah chuih dingmi Nations League fixture cu a tlolh lai.
Cu leng ah Juventus nih Serie A ah Crotone he chuih ding siseh, Champions League group level ah Dynamo Kyiv FC he chuih ding zong tlolh ding dirhmun a si.
Kan hnu thla Nations League ah Sweden he an chuih mi ah C.Ronaldo nih kawl 2 a rak sut duk. Cu ca ah C.Ronaldo hi international level zuamnak ah kawl 100 a sut tu pahnih nak a hung si cang. Vawleicung huap in chuihmi puai lak ah kawl tambik hi Iran rammi pa Ali Daei a si i, kawl 109 a sut.
A tu ah C. Ronaldo cu COVID-19 positive a si i, puai tam nawn a tthul ding dirhmun a si. Asinain, zawtzual ding dirhmun cu a phan lailo tiah an zumh cio.
Source: CNN
