Bangladesh ram ah Myanmar ram in a zaam mi Rohingya miphun hna cu Bangladest nawlngeitu hna nih mipal set lonak le a hla ngai mi tikulh pakhat ah chiah ding in a chek cuahmah tiah theih a si.
Khuacaan a dik lo i, tilet le thlichia a chuah lengmang nak a si tiah khuacaan zohtu Agency pawl nih an chim tawnnak Bangladesh in a hlat ngai nak tikulh pakhat ah Rohingya miphun ralzaam pawl chiah an timh hna. Bangladesh ram Cox Bazaar ah a um mi Rohingya hna cu Bus ngan pipi 10 hrawng in Chittagon lawngbual lei ah an kalpi hna tiah mit hmu tu hna nih an chim.
Basancha Tikulh timi hi Bangladesh ram rili chung ah a luancia kum 20 hrawng khan a hun chuak mi a si i, 2017 kum thawk khan Bangladesh cozah nih mi umnak ding ca ah a timhtuah tiah ruah a si.
2017 kum ah ARSA le Tatmadaw i kahdohnak hnu ah Tatmadaw nih ram kilvennak ca ah tiah hriam hmang in Rohingya mipi thahnawnnak le tthawlnak an tuah ruang ah Rakhine ram Rohingya miphun nuai khat leng cu Bangladesh ram ah an rak zaam. Cu ralzaam pawl umnak ca ah tiah Bangladesh cozah nih milu singkhat hrawng ca ah hi tikulh hi umnak a tuahpiak hna tiah ruah a si.
Khua caan thalo le ttotho thlichia a chuah lengmang nak hmun ah Rohingya miphun an chiah hna lai tiah theih a si tikah Nuhrin Covo a zoh tu hna nih cun “minung khuakhan a bang lo” tiah Bangladesh cozah an mawhchiat.
Asinain, Bangladesh cozah nih a tulio ralzaam camp nakin inn zong an ttha deuh i cuka um ahcun zuatkhalhnak, ngatlaihnak le cinthlaknak rian phun 18 hrawng an ngah khawh lai tiah Rohingya mipi an lemsoi hna tiah theih a si.
Atu ahcun Bus ngan pipi in Basancha tikulh lei ah zei can sau um lai hngalh loin Rohingya miphun hna cu Bangladesh Cox Bazaar in a hlat ngai nak tikulh ah chiah hram an thawk cang hna.
Source: BBC
