Thailand-Myanmar ramri Mae Hong Son hmunram hrawng i UWSA “ဝ” hmunkhuar nak pawl cu thial awk ah Thailand nih a ti hna caah UWSA nih hriampi kahnak hna cu timh cia in an chiah i kaphnih kar i kahdoh awk ah a linsa ngaingai tiah Thailand hrambunh Khaosod nih nihin ah a tial.
Myanmar ramchung tlang cung hriamtlai hna lak ah thazaang a thawng cem mi UWSA nih Mae Hong Son pawngkam Doi Nong Luang le Doi Hua Ma hna telhin a dang hmun 5 ah hmun an khuar cu cuti hmun an khuar nak hna cu Thailand ramchung ah a si caah thial viar uh tiah Thailand lei nih an ti hna hi a si.
A tu bantuk ramri kong buaibainak hi a luancia kum 10 tluk khan a rak si cang i kan hnu November 18 le 19 ah khan UWSA hruaitu hna le Thailand ralkap bawi hna cu Thailand ram Chiang Mai ah tonnak an ngei i rithaisii kong,ramri kong le thil dang dang an ceih hi a si.
Cuti ton nak ah cun Thailand ralkap nih a ralai mi December 18 hlan hrim rhim ah ramri i UWSA hmunkhuar nak hmun 7 cu thial dingin an hal hna hi a si.
November 20 ah khan RCSS-SSA ttuanvo ngeitu cheukhat le Thailand ralkap hna nih Mae Hong Son pawngkam i UWSA sakhaan chungah lut in hman thlak nak le video laak nak te hna
an tuah hnu ah a tu bantuk in kaphnih kahdoh awk ah a hun linhsat chin chin hi a si.
Atu bantuk dirhmun ruangah Thailand ralkap zongnih 81MM,120MM hriampi kah nak pawl cu timhcia in an chiah ve i kaphnih kar kahdohnak tuah dingin a linsa ngaingai.
UWSA lei nih cun kan ramri lehmah pakhat zong hnu kan tolh lai lo tiah RFA ah a chim.
