India-Myanmar pehtlaihnak Tio hlei ramri gate cu hon piak dingin April 19 zanlei sang ah mizapi nih an hal hna i cuka ah buainak tlawmpal a chuak tiah kan theih.
Mizoram Zokhuathar lei ah mizapi an i pumkhawm i Rihkhawdar lei zong an i pum khawm ve, caan zeimawzat an um hnuah gate hon piak dingin an hal hna tiah theih a si.
India cozah siannak lak hau lo in Mizoram le Chin ram i tlawnkai khawhnak Free Movement Regime (FMR) a hrawh hnuah pehtlaihnak lampi khar a hmasabik a chuah hi a si.
External Affairs Minister Dr S Jaishankar cu April 11 ah Mizoram ah a rak phan i Free Movement Regime (FMR) khar a si kong hrilhfiahnak a chimmi ah India ram himnak ruah ruangah a si a ti i Myanmar ram a buai lo ah cun a tu bantuk tuah hi a hau hnga lo a ti.
Ramri gate hi zei tiang dah khar a si lai i, zeitik ah dah hon a si lai hngalh a si lo. Chin hrinsor Mizoram ummi hna nih cun India ram MP i thim lai a si caah ramri hi khar a si, tiah an chim ve.
Ramri gate hon piak dingin duhnak langhternak i buainak a chuahnak ah hin hliamtuar ngai ngai cu an um lo.
