A tulio Myanmar ramkomh ah Tatmadaw nih 2020 thimnak phichuak kong ah biahalnak a tuah cuahmah. Asinnain, kamkhat lei ah General Min Aung Hlaing kum 65 a tling cuahmah cang.
A luancia 2016 kum June thla ahkhan Tatmadaw thawngfianhnak pakhat ah thawngfianhtu nih General Min Aung Hlaing riantuan caan hi rikhiah lo mi a si lo tiah a rak chim.
2020 thimnak phichuak ningin Union Parliament le cozah sernak ding rianthawknak cu thawn ding ah Tatmadaw lei nih an hal hna ti mi thawng a chuak. Hi lio te hi General Min Aung Hlain pension lak lai te nikhua he an tong celngel.
General MAH nih a rak chim mi cu, “Tatmadaw luzik tuanvo khinh mi hi rikhiah piak lo mi a si lo. Rikhiah piak mi caan tiang lawng tuan ding ti mi a um. Cu ca ah term sauhter ti mi zong a um lo. Term rikhiah piak a si. Cu tiang a tuan lai ti mi ri kan khiah piak” tiah a rak chim. Asinain, kum zeizat a si tiang ti mi cu a rak chim lo.
Asinain, 2016 kum June thla ahkhan Yangon khua ah tuah mi Tatmadaw thawngfianhnak ah a tulio Lei, Ti, Thli ralkap Chief of General Staff Mya Htun Oo nih Defense Minister Counsel (ကကန) nih 2014 kum ah a rak chuah mi bantukin Tatmadaw luzik General le Deputy General hna cu kum 65 tiang a si tiah a rak chim bal.
A tulio General MAH hi ara lai mi April thla ah kum 65 a tling ding a si tiah Tatmadaw chimrelnak ngeitu Major Zaw Min Htun nih nikum ahkhan a rak chim fawn.
Media he i tonnak ah cun, “A tulio cu 2020 thimnak ah cozah a ser khawhnak ding ca ah palai ai ngeih mi party hna nih cozah an ser nak ding khua caan a si. Zeibantuk ramkhel tihrah kan phak lai theih khawh a si lo. Cu tihrah a dih tikah hi biahalnak hi a dikthliar in leh nan si telai” tiah a rak chim.
Tatmadaw nih cu ti an chim lio ah NLD party nih landslide in teinak a hun co i, Union Parliament au in cozah ser ding ah a hun i tim lam ve than cang. Cu lio celngel ah a tu Tatmadaw nih thimnak kong ah biahalnak zeimawzat an chuah pi lio he ai tong.
Asinain, thinfung ningcang loin a phi a chuah ruang ah thimnak phichuak cohlan ding le ding lo ti mi bia a hung chuak than. Cu hnu ah Tatmadaw nih uknak lak lo ding tiah ruah ding a si lo ti mi le phunghram pi hrawh khawh a si ti mi bia zong a hung chuak phah cang.
2020 thimnak tuah hlan thla nga ai duh ahkhan Russia ram media pakhat Arguments and Facts ti mi thawngzamh nih General MAH cu bia an hal i, “kum 40 chung ralkap, uknak le ramkhel ah hmuhton a ngei mi ka si i , rampi ca ah riantuan ding ka duh rih ko” tiah a rak chim. Cu hnu ah Japan thawngzamh he biaruahnak ah, “ka hmuhton vialte hi rampi le mipi ca ah kai zuam rih lai, phunghrampi bantukin pek mi rammi covo he i ruang in rian ka tuan lai” tiah a rak chim.
A cunglei kong vialte hun fun tikah a tulio rampi buainak le ramkhel meitilsa a chuahnak hi Tatmadaw pakhat ai-awh siloin, General MAH he ai pehtlai mi a si tiah Journalist U Si Thu Aung nih a chim.
Rampi phunghram bantukin rampi President nih National Defense and Security Counsel (KALUNG) hnatlak pi nak thawng in Tatmadaw luzik thim ding a si lai tiah a um. Hi zawn ahhin a tulio General Min Aung Hlaing hi awlokchong in a um tiah an chim. “General Min Aung Hlain ai dinh hlan lo President nih KALUNG a au lai lo. Pension a lak hlan ah KALUNG au uh ti zong ah NLD cozah nih auh dawhdang in a um fawn lo. A mah tein pension a la ko lai” tiah U Si Thu Aung nih a chim.
Asinain, 2008 phunghrampi nih Ralkap kha an mah tein zalong tein tawlrelnak nawl a pek hna ca ah Tatmadaw luzik Genral Min Aung Hlaing riantuan caan hi a si khawh chung in sauh khawh ding ah an i zuam i, a ngah zong a ngah kho ti a si ve fawn.
Genral Ming Aung Hlaing hi pension nih le a lai deng tung. Thimnak result ah le President a si kho fawn tung lo. Rampi hruaitu si a duh ve fawn tik ah lam pakhat khat kawl ding lawng a tang ko. Cu cu Rampi uknak lak lawnglawng ai duh ko cang ti a si.
Min chim duh lo mi Tatmadaw upa pakhat nih cun, “Rampi uknak maw a lak taktak lai, a siloah bargain (a-pe-a-yu) dah tuah a duh ruang ah ai cawltal ter ti cu a mah lawng nih a hngalh lai” tiah a chim.
A tulio Myanmar ramkomh chung ah Tatmadaw nih an ralkap mawtaw he ramchung khuapi cheukhat ah an chuak i, rampi cheukhat Tatmadaw duhnak le thapeknak an langhter tikah Tatmadaw nih uknak lak taktak lai ti hi ram mipi an thin a phang cio.
H vialte inntuar khawhnak le tan khawhnak ding ca ah Parliament meeting auhnak, cozah sernak, cozah riantuan ning le thimnak phichuak zohfelnak hi mithep lo tein zoh ding ah 88 Sianghngakchia hruaitu Ko Min Ko Naing nih ram mipi sin ah a chim.
Theihternak: Hi capar hi Myanmar Now ah catial Nyaing Hlaing Win nih a tial mi Kawl capar kha Laica in CBN nih ai tlak ning in kan rak leh chin mi a si_Editor.
