Party Chairman U Kyaw Myint cu thongzaam a si tiah tlaih le tazacuai, thongkhumh nolh a si hnu ah Myanmar ramkomh chung ah NLD changtu party nganbik pahnihnak cu UEC nih October 17 ni thawk in a hrawh cang.
UDP Party hrawh a si cang ruangah UDP Candidates pawl zong hluttaw thimnak zulhphung dal 10 (g) ningin thimnak ah tel khawh an si lailo tiah thanh chih a si. UDP hi tukum 2020 thimnak ah palai dihlak 1131 i cuh dingin ai timtuah mi an si.
Asinain, September 29 ah thongzaam a si ti mi ruangah Chairman U Kyaw Myint cu rak tlaih le tazacuai a si. Cu leng ah Tuluk ram in a ra mi Billion renglo phaisa nak (black money) kong zong ah an kherhlai cuahmah lio a si.
UDP hrawh a si nak a hrampi taktak hi ramdang in bawmhnak a lak ruang ah a si timi kong hi UEC cathanh ah aa tel. Thimnak zulhphung he pehtlai in hibantuk ramkhel phu chungtel hna cu thimnak ah luh khawh an si lo tiah aa tel mi a si.
U Kyaw Myint nih Tuluk ram in a ngah mi phaisa hi Tuluk ramri Hyundi timi phunglut lo phaisa kuatchanhnak in kuatchanh mi a si tiah President chimrelnak nawlngeitu U Zaw Htay nih a chim.
Cu phunglut lo phaisa cu ramchung bank a si mi UAB, KBZ, AYA Bank pawl ah a lut i, a dihlak 16.315 billion kyats a si tiah theih a si. U Kyaw Myint nih 2015-20 tiang AYA Bank in phaisa karh a ngah mi hi 14.814 billion Kyats a si tiah an chim.
UDP Chairman le a phaisa kong he pehtlai in a zalong mi mibu pakhat nih an chekhlat cuahmah lio a si. A tukar hrawng ah an hmuh thar mi cu NRC palhnak, a ngeihmi phaisa billion 23 kyats hi phunglut phaisa a si le si lo timi leng ah ramchung lut in phunglut umnak nawl a ngeih kong hi an chekhlat cuahmah lio ti a si.
Cu leng ah U Kyaw Myint nih a ngeih mi Myanmar Kyaw Company hi phunglut lo phaisa cawihnak a tuah i, thil kuatzuarh nak, phaisa hrambunh nak, register dik loin a tuah ti mi kong ah an kherhlai cuahmah lio a si.
UDP hi 2010 kum ahkhan rak dirh mi a si. 2010 le 2015 kum ahkhan voikhat hmanh teinak a hmu lo i, 2020 ah cun palai 1000 leng in ramkomh thimnak ah a nganbik changtu party dirhmun ah a dir mi a si.
Source: BBC
