Ralkap nih uknak an lak hnu ni 16 a rauh chung ah central Bank telh in ralkap websites cheukhat cu hackers phu nih an hrawh piak cuahmah cang hna tiah theih asi. Hi chung ah zapi nih hngalh bik mi cu Tatmadaw thawngdik thanhnak phu websites pakhat a si.
Facebook chung hi thawng a len ning ah cun hackers phu hi Myanmar hackers phu an si ti a si. “Kan i tinh mi cu uknak la tu ralkap cozah council hi thlak kan duh. Cu ca ah ralkap council thazaang a petu zung pawl le Online in rian an tuan nak paohpaoh cu kan hrawh piak dih hna lai” tiah Myanmar Hackers phu nih facebiok ah an thlah.
Zeitindah An Hrawh Khawh Ning?
Myanmar Hackers phu nih ralkap he ai pehtlai mi websites pawl an hrawh ning hi mipi i telnak in an hrawh mi a si. “Na kut in Hack nak ah rak i tel ve” tiah blog link pakhat an thlah. Cu an thlah mi cu mipi nih an lut i, an hmeh cio tikah ralkap websites pawl hrawhnak ah hrang a tlai ngaingai ti a si.
A tulio ah Central Bank, DICA, Commerce, Revenue, DOT, Tatmadaw Thawngthanhnak website, MWD TV, MRTV le Private media cheukhat cu an hrawh cuahmah cang hna tiah theih asi.
Nihin February 17 zing suimilam 10 tiang ah hi websites pawl hi luh khawh an si tilo. Central Bank, Tatmadaw thawngthanhnak, Ralap TV asi mi MWD TV le DICA websites hna cu zoh khawh an si lo.
Hibantuk in websites an hnahnawhnak hi Yangon khua ah a um mi websites lei thiamsang pakhat nih cun DDoS Attack tiah an kawh tiah a chim. Websites pakhat ah a lut mi traffic kha minung tam tuk nih an zoh bantukin an tuah piak hna tikah an website data a khat i an websites pawl a tlak hi a si tiah a chim.
Source: Irrawady
