Uknak latu Ralkap Council nih uknak an lak hnu ah rammi phaisa $ 5.7 billion an control khawh cang ca ah Bank System an kutcung ah a um cang tiah Justice for Myanmar nih a thanh.
Ralkap nih February 1 thawk in uknak an lak hnu ah Myanmar ramkomh nih ramdang phaisa hran US $ 5.7 billion cu an control khawh cang. Myanmar rampi nih ramdang lut phaisa hran ai ngeih mi chung ah $1 billion hi US cozah nih a control lio a si i, a dang billion tampi cu an control khawh cang.
Ramdang lut phaisa hran ti mi hi ram mipi phaisa a si i, a tulio ah rianrang tein azizut nak a um lo ahcun ralkap thazaang thawnnak a si chinchin cang lai. Cu pin ah Mipi nih ralkap dohnak an tuah mi hi ningcang loin an tuah khawh hna lai. Ralkap bawi pawl zong a rumter chin hna lai tiah Justice for Myanmar nih ralrinnak a pek cang.
Justice for Myannar nih hin Bank pawl an riantuan ning le phaisa an lehthal ning an chekhlat tikah Myanmar ram mi ca ah phais a lut mi phaisa si hna seh, Bank he ai pehtlai mi computer sehthilri he ai pehtlai mi SWIFT, ramdang pehtlaihnak Bank pawl, Credit card pawl in ralkap nih phaisa an control khawh rih tiah an thanh. Rianrang tein control khawh ve lo ahcun vawleicung phaisa le kawlram he pehtlaihnak hna nih ralkap an bawmhchanh ah a cang lai tiah an chim.
Cu ca ah Justice for Myanmar nih Myanmar ramkomh ah vawleicung phaisa pehtlaihnak phu pawl cu nawlnak ca a chuah colh cang.
- A tu ah ralkap kutcung a phan cang mi rampi ngeih mi chawlehnak agency pawl le Central Bank telh in ramdang nih Kawlram ca ah bawmhnak an pek mi pawl cu mak cang ding.
- Rampi nih a cheu bang lawng ngeih mi Bank pawl tel hin ralkap ngeih mi chawlehnak hna cu ramdang nih phihkhar dih ding.
tiah an halnak ca an tial cang. Ralkap nih ramchung ramleng ah phaisa kuatchanhnak an tuah khawh lo nakhnga ca ah Private Bank le ramdang Bank hna nih biatak tein chekhlat a herh tuk cang tiah an chim.
A tulio Burma ramkomh chung ah phunglut in ramdang nih phaisa hram an phum mi hna nih mipi nih an khon mi phaisa a si ca ah ralkap nih an kutcung ah an chiah khawh cang lai ca ah thinphang ngai dirhmun a si cang. IMF nih 2020 September thla ahkhan bawmhnak $ 6.7 billion a rak pek cang. US nih cun US ram ah a um mi Kawlram phaisa $ 1 billion cu ralkap bawi pawl nih an tongh khawh lo ding ah an chiah cang.
Source: Justice For Myanmar
