Tatmadaw nih mipi thim mi cozah kut in hramhram in uknak a chuh hnu in February 1 in 18 tiang ah tlaihkhih a tong mi mipi minung 500 an tling cang tiah AAPP (Assistance Association for Political Prisoners) nih a thanh.
February 1 zingka in ni 18 a rauh tiang ah ralkap mi mipi an tlaih mi minung 521 an si cang tiah AAPP lei in EC chungtel U Aung Myo Kyaw nih a chim.
“An tlaih hna thawng hin hi buainak hi a dih lai lo. Hluttaw Palai pawl telh in activists pawl tampi zong an tlaih cang hna. Hihi a phi a si lo. Ramchung ah mipi dihlak nih an hal mi hi ai khat mi lawngte a si ko. A tu le bang ah cun CDM a cawlcang mi zong an tampi cang. Hi buainak hi phisin khawhnak ding ca ah mi tlaihkhih hin a dih kho ding phun a si lo. Mipi nih an duh mi pek kha a phi cu a si ko” tiah a chim.
Ralkap nih mipi chung in an tlaih mi hna lak ah thongthlak ding in biacaih mi minung pathum, warrant chuah in tlaih ding ah kawl mi minung 32, an thlah cang mi minug 44 le a tutiang an tlaih cang mi hna minung 477 an si.
State Counselor Aung San Suu Kyi, President U Win Myint telh in Union Minister pawl, Hluttaw palai pawl, Ramkulh ramthen minister pawl, activists, zungthiam, sianghngakchia hna ti in tlaihkhih a tong mi hna hi an si hna. A cheu cu inn ah an erh hna i, a dang cu ralkap camp ah, thonginn le palik camp hna ah an chiah hna. Micheu cu khoika an chiah hna hmanh theih an si lo tiah U Aung Myo Kyaw nih a chim.
Nizaan February 18 ahkhan Naypidaw, Mitkyina le Myawady khua ah duhlo langhternak a tuahtu minung 50 leng an tlaih hna. Union Hluttaw Representing Comittee chungtel minng 15 zong rampi rawiphirnak case in warrant an chuah cang hna. Ramchung ah CDM a hawhhrih tu minung pawl zong warrant an chuah cang hna i cu chung ah lemcang minthang minung paruk zong an i tel tiah theih a si.
Source: RFA
