Ralkap le Mipi cozah he khuahkhat in ukṭi mi ram kong le tuanbia hnglah duh ahcun Chile ram kong hi lanhtak awk a ṭha lo mi a si ve. A biapi taktak mi Chile ram President Aylwin le a ramhruai ning kong cu hi capar nih ai hmuitinh deuh. Aa-na-sin pawl he zaanriah a dumṭi ko nain, Chile ram cu Democracy ram ah a rak hruai khawh.
1990 kum in ai thawk mi Chile ram ah ralbawi General Augusto Pinochet le a ralbawi pawl ralvennak ca ah an rak ser mi Chile Ram Phunghrampi zong a rak um ve. A fawnak in chim ah cun ralkap nih chilhchih mi Phunghram kan ti ko lai. Kawl ramkomh 2008 phunghram bantuk hin National Defence and Security Council (Ka-lung) zong an rak ngei ve.
Chile ram le Myanmar ramkomh ai dannak pakhat cu Chile ram ahhin ramchung hriamtlai phu he buainak ti mi Civil War (tlangcung hriamtlai he buainak) a rak um lo. An ram innpa a si mi Argentina he tikulh pakhat an i cuhnak hrawng lawng hi a si.
Chile ram ah Democracy thlennak caan lio ah a biapi ngaingai mi cu Aa-na-sin chan donghnak Democracy chan thlennak karlak lio cozah caan kha a rak si ve. Kha lio ah President a rak tuan mi hi President Aylwin a rak si. A mah hi ralbawi Pinochet chan ah Pinochet a rak doh tu pa a rak si.
Chile ram ah President Aylwin a hung chuah ahhin Chile ram cozah hi mipi cozah le ralkap nih a khuah in an rak uk lio caan a si. Chile ram ah nuhrin covo kong he pehtlai in ralkap nih an tuahser mi hna cu President Aylwin nih a neemnak in a rak kalpi ti a si. Nuhrin covo a rak dirpi tuk lo ruang ah biatka ngai in an rak soisel bal ve.
Asinain, ralkap chan lio ah mipi nih an rak tuar mi le palik nih tuanvo an rak lak khawh taktak lo mi mipi harsatnak le temtuarnak hna cu President Aylwin pumpak nih a va ton hna i, lungsau nak le thapek nak a va tuah tawn ti a si. Hihi a hnu ah mipi nih an fian mi cu thlennak caankarlak ah thildik le biatak a chuah khawh lo zong ah cozah nih kan in philh hna lo ti mi a rak langhter khawh tiah mipi an lung a rak dam ti a si.
President Aylwin chan ahhin ramchung remdaihnak, a hnoksak ngaingai mi cozah le uknak tungtlang ṭhawnnak, mipi nih phungzulh khawnak ca ah phung ṭhawnnak le chawleh chawhrawl lutunnak hna cu biatak in a rak tuah ti a si. Chile ralkap phu lei in rampi uknak lak ding ca ah an rak leem ko nain a rak duh lo. Phung le lam lonh in aa-na-ting nak tuah lo ding ah a rak i sum.
Mithar le mihlun pawl i fonh in rampi hruainak ca ah Beaurocracy system cu hmailei ca tiang ruat in fak ngai in a rak i zuam. Chawlehnak a ṭhawn lo ah cun Democracy a cak lo ti mi kha fiang tein a rak hngalh ca ah chawlehnak kha biatak tein ṭhawnter a rak i zuam. Ramdang he pehtlaihnak ṭha tein a rak i zuam.
President Aylwin hi ramdang he pehtlaihnak kong le Democracy Institution ṭhawnnak ca ah biatak tein a rak i zuam i, a hlawh zong a rak tling ti a si. Khuachia (Chile ralbawi) pawl he zaanriah eiṭi tikah karhlan i palh lo ding ai zuam bantukin, zualral a can sual tikah kut khat lei in ralbawi pawl teng ko in thongh nak ding ah darkeu zum zong a kut ah ai tenh chih tiah caṭial thiam hna nih an chim ṭheo. Cu ca ah, a mah bantukin ralkap a rak dotu opposition party pawl he pehtlaihnak a cah sual lonak hnga tiah cozah rank zong tampi a rak pek hna.
President Aylwin chan ah ramhruai a thiam bak tiah an rak ti tawnnak pakhat cu uknak le hruainak ah ‘keimah keimah’ ti loin, cozah hruainak chung ah ai tel mi mibu le party dang pawl hna zapi ai-awh le zatuak biakhiah nak a chuah khawh nakhnga Consensus in a rak hruai hna ti a si. Democracy thlennak ah Democracy a duh tu mibu pawl kan lung ai rual lo ahcun kan hlawh a tling lai lo tiah fiang tein a rak hmuh.
Cu leng ah Mipi ai-awh tu CSO pawl, Media pawl le a dang; cozah a si lo mi mibu pawl hna nih cozah he hmunkhat kal khawhnak ding ca ah lam kaupi a rak hun piak khawh hna. Media zalonnak ca ah a rak i biatak ngaingai. A zalong mi biacaihnak, Hluttaw biacaihnak hna a ṭhawn khawnak ding ca ah a rak i zuam.
President Aylwin hi party ṭhawnnak ca ah ai zuam ngaingai fawn. A mah pumpak hrim hi vawleicung Democracy thlennak ah a min a rak thang mi Nelson Mandela le Kim Dae-jung bantukin President term khat lawng a rak tuan ve.
Ralkap Tlerkhuanhnak A Rak Tuah Lo
A cunglei ah langhter cia bang in President Aylwin hi ralkap pawl tlerhkhuanhnak a rak tuah lo ngai ti a si. Nuhrin covo buarnak kong ah ralkap pawl cung ah mawhchiatnak le hrocer nak a rak tuah lo. Acozah duh a nun khawh nakhnga tiah Eihmuar dohnak kong ah ramkhel, chawlehnak he i sengtlai ding in a rak tuah khawh.
Rampi himnak le security kong ah thlennak a chuah khawh nakhnga Hluttaw in thlenremhnak a tuah nain, hramhram in tuah kha rak hrial. Ralkap Institution remhnak ding ca ah Reform lawng a rak i tinh i, Undermine a thumh. System thlennak lawng ai zuam i, Insitution a rawk nak ding ah a rak i zuam lo ti a si.
Voikhat cu Chile ralbawi General Augusto Pinoche fapa cu eihmuarnak a tuah tiah Media pawl nih an rak tial ruang ah ralkap nih cozah inn le Media zung pawl cu an rak luh hnawh bal hna. Khuapi chung ah ralkap ṭheng le mawtaw pipi cu khualai ah an rak mawngh bal ve.
Aa-na-sin pawl lungput in a rak chuak tawn mi biafang cu Guardian le 
ti mi a si. Cakei thlachiat ruah ruang ah caw a luat ti a si lai cu. Praetorian ti mi sullam tlawmpal in langhter ahcun; a hlan lio Greece le Rome cozah chan ah khan Siangpahrang pawl himnak ah Micontu pawl kha Praetorian tiah kawh an rak si.
An mah pawl hi Rome cozah chan ah a biapi ngai mi dirhmun ah an rak um. A ngai ah cun Praetorian pawl hi ramdang va kauhnak le Siangpahrang himnak ca lawng ah hman mi an rak si ko nain, Ramkhel kong ah thil biapi caan a chuah tikah Praetorian pawl nih an duh lo mi Siangpahrang pawl, uktu pawl hna cu an thah, an ṭhumh tawn hna i, an duh mi uktu lawng kha ram an ukter khawh ve.
Kam khat lei ah an thlak khawh lo mi le an thah khawh lo mi uktu pawl hna an um ve tawn. Cu zawn zong ah cun kha uktu pawl nih rian an ṭuan khawh lo nakhnga tiah mi an rak nawnnok lengmang ti a si. Cu ca ah Politician pawl nih an rian a tluan khawh nakhnga tiah Praetorian pawl kha ziknawh an rak pek lengmang hna ti a si.
Cu ruang ah mifim Plato nih The Republic ti mi ah a tial mi cu ralkap pawl nih mipi lei in conglawmhnak an hmuh ding ti a biapi tuk tiah a rak ti. Cu bia cu chanthar aa-na-sin pawl ca ah kutken cauk pakhat bantuk a si i, chanthar Democracy system ca ah buainak meiṭil ai sem lengmang nak hi a si tiah fimthiam hna nih cun an chim lengmang.
Hruaithiamnak A Biapi
Thlenremhnak le rialditnak caan karlak ah ramhruaitu hna nih hruaithiamnak a biapi ngaingai. Ralkap nih cozah inn le khuapi chung ah an ṭheng le an mawtaw he power an hmuhsak tikah siseh, mipi namnehnak an tuah tikah mipi thim mi cozah lei nih lamhruai a biapi ngaingai.
President Aylwin cu hibantuk thil a rak can tikah lau lo tein a rak um i, hmakhat te ah mipi sin ah bia a chim colh. Mipi sin ah bia a chim mi cu, “Chile ram kan Democracy hi hrocernak tang ah kan phan rih lo” tiah mipi sin ah ṭihphang lo ding in bia a chim colh. Ralkap nih an duh tik paoh ah an duh ning in uknak an lak khawh ding a fiang ko nain, biatak le thildik cu kan i ruahchan khawh rih ko tiah a chim.
Mipi Cozah Le Ralkap Karlah Ah Democracy Thlennak
President Aylwin nih hin mipi thim mi cozah le ralkap pehtlaihnak karlak ah cozah lei nih dikfel ngai in an pehtlaih khawh nakhngak a rak i zuam ti a si. Pumpak chawlehnak le party chawlehnak ca ah a rak i tel lo. Cu ruang ah General Augusto Pinoche an tlaih hnu ah a rak kai than mi ralbawi pawl he a dotdot tein Democracy thlenremhnak ah cozah hruainak an zumh deuhdeuh.
Kam khat lei ah a rak kai mi Chile mipi thim mi cozah nih Chile ram ralkap cu professional deuhdeuh an can khawhnak ding ca ah siseh, ralkap uknak lei ah a kir tilonak ding ca ah siseh, aa-na-ting nak a chuah lo nak ding ca ah ralvennak ca ah hruang sernak, phung nih uknak, chawleh tthawnnak hna ti in a dotdot tete in an rak pehzulh khawh ve.
Chile ram Phunghram pi zoh ahcun thlenremhnak ding ca ah a har ngaingai mi phunghram a rak si ve. Ralbawi pawl nih an uknak kha thlah ding ah fawizang tein a can lonak hnga tiah a hlankan in an rak i huhphenhnak vialte hna zoh ahcun mipi ca ah ruahchannak a rak tlawm ngaingai ti khawh a si. Asinain, Democratic Instituion tthawnnak, mipi le ralkap i zumhnak a hun tthawn lio te ah General Augusto Pinoche cu London ah 1998 kum ah an rak tlaih ai tong i, Chile ram tonnak tawhfung a rak si tiah Harold Trinkunas nih a chim.
Myanmar ramkomh zong hi a luancia kumruk ahkhan Francis Fukuyuma nih ralrin a pek bal. “A tulio ah cun NLD nih hin minung pakhat lawng helhhum loin a dang Democracy party pawl zong kha thangcho ding a tuah hna awk a si lai. Cu tik ah ai lo lomi minung hna sin in ai dang mi ruahnak cio kha chuak lai i, zapi nih cohlan khawh mi mibu pakhat a chuak kho lai tiah ka ruah.Democratic muru fehfuannak le phunglam tthawnnak lawng hi thlennak ca ah hlawhtlinnak a si. Aa-na-sin General Augusto Pinoche kut tang ah Chile ram khi zohhmanh uh. Mipi cozah le ralkap nih kum 15 an uk hnu ah a zapi ai thleng i, a ‘OK’ dih” tiah Francis Fukuyuma nih ralrin a rak pek bal hna.
Source: Sai Tun Aung Lwin (The Soldier and The Changing State)
