Ralkap nih duhlonak a langhter mi mipi cung ah puarhrang ngai in thil an tuah chin lengmang khawh tiah UN lei in Myanmar ramkomh ai-awh Tom Andrews nih ralrin peknak bia chim.
“Ralkap nih phung ning loin mipi thim mi cozah upa hna a thlak hna hnu in ralkap nih mipi cung ah ruru hranghrang in thil an tuah mi hi nihin February 17 ahhin a cang kho i, ralkap puarhrannak a karh chinchin kho mi a si” tiah Tom Andews nih a chim.
A tulio Myanmar ramkomh chung ah mipi nih ralkap Council duhlo langhternak a karh chinchin i, Yangon le khuapi cheukhat hna ah cun mipi lamzawhnak a karh chinchin. Nihin Yangon khua ah cun mipi lei nih CDM ah cozah riantuan hna i telnak ca ah forhfialnak a karh chinchin cang.
Mawtaw a ngei mi hna nih lamcung mawtaw a rawk tiah Yangon lampi cheukhat cu mawtaw nih a kham dih cang.
Cu hlan zong ah a tubantuk buainak le lamzawhnak a karh tikah ralkap nih thazaang chap in mipi cung ah ruru hranghrang in kah le thahnak a chuak tawn mi a si tiah Tom Andrews nih a chim. A tulio ramchung ah ralkap pawl an hmunhma thialkamnak a karh ngaingai cang. Hihi mipi cung ah puarhrannak ai thawk lai hmelchunhnak a si tiah a chim chap.
A luancia ni tlawmpal zong ahkhan khuapi cheukhat a si mi Naypidaw, Mandalay, Mitkyina hrawng ah palik le ralkap nih doh-aunak a tuahtu mi pi hna cu fak ngai in an thencheu hna i, meithal in an kah hna.
Source: BBC
