Ram hrawktu Kawl ralbawi hlun U Than Shwe nih August 14 ah Naypyidaw a rak phan mi Tuluk Foreign minister Mr. Wang Yi sin ah ram chung le ram leng ral chungin venhim nak caah tiin bawmh a hal tiah theih a si.
Tuluk ram Media lian pakhat a si mi Xihua News nih a langhter ning ah “Myanmar ram cu ramdang le ramchung ral chungin kan ven him khawh nak hnga Tuluk nih bawmhnak na kan pek nak lai kan i ruah chan ko tiin U Than Shwe nih Tuluk Foreign Minister Mr.Wang Yi sinah bawmh a hal.” tiin an langhter.
U Than Shwe nih a hal mi hi hriamnam maw a si, a siloah zei set dah a si timi tu fiang in an langhter lo.
Kawlram chung ramthen le ramkulh vialte ah kahdohnak a chuah cuahmah lawng siloin Lashio um North Eastern Command sakhaan pi a sung i khuapi 70 leng a sung cang mi SAC rual nih hin ramchung ral teinak dingah ramleng an i bochan cang mi a si tiah ramkhel lei fimthiam hna nih an zawndomh.
“U Than Shwe nih bawmh a hal mi hi fiang tein theih a si lo nain raltuk nak hriamnam hi an chambau cang timi a lang.dothlennak ralkap hna doh awk ah hriamnam tam deuh an herh.Shan ram chaklei hna nih Technical lei tha deuh in an doh hna caah cu bantuk an lehrual khawh hna nak ding hriamnam a si lo ah a herhmi thilri hna bawmh ding in a hal hi a si.” tiah ramkhel lei fimthiam mi pakhat nih a chim.
Cu pin ah “ khat lei ah kawlram chung kahdohnak hi Tuluk tawlrel piak nak in daih ter an duh zong a si kho.a hlei khun in Three Brotherhood aa ti mi hna hi daihter an duh.cun ramkhel lei in bawmnak kan pe seh ti an duh.voikhat zong tuluk tuaktaan piak nak in Three Brotherhood le SAC karlak ah Tuluk nih Haigeng Agreement a tuah piak hna i caan zeimawzat kahdohnak an rak ngol. A tu zong ah cu nak a sang deuh in tuaktaan piak dingin an i ruahchan mi si dawh a si.” tiah a chim chap.
Cu ni thiam thiam ah Mr.Wang Yi cu Kawl ralbawizik Min Aung Hlaing nih a ton ve i Myanmar nih Tuluk ram he pehtlaihnak a that khawh nak ding cu biapi ah an chiah mi a si kong a chimh ve.
“Shan ram chaklei kahdohnak ngol dingin Tuluk nih rak tuaktaan piak mi cu kan i lawm ngai ngai. Kanmah zong nih Myanmar ramchung ah daihnak a um khawh nak hnga kan i zuam cuahmah i hi ah hin na kan bawmh nak lai kan i ruah chan ko.” tiah Min Aung Hlaing nih cun a chim.
Cu ton biaruahnak ah cun SAC nih tuah ai timh mi thimnak ah le Milu relnak ah tuluk nih bawmh nak a kan pek lai tiah SAC lei nih an thanh.
Tuluk Foreign minister Mr. Wang Yi hi MNDAA le ttangti phu hna nih Lashio hrambunh SAC Sakhaan lianpi an laak hnu nitlawmpal a rauh ah Myanmar ram a rak tlawn hi a si.
