Rakhine ramkulh Minpya peng ah cun Tatmadaw ralkap le AA kahnak a dai kho lo i, nihnih chung fak ngai in kahdohnak a um tiah theih a si. Tatmadaw lei nih kahnak kan tuah lailo tiah thawng an rak thanh ko nain, AA he i kahnak an ngol kho hlei lo. Nizaan October 1 tiang ah Rakhine ramkulh Minpya peng ah kahnak a pehpeh in a um ko rih tiah theih a si.
“Tuzing suimilam 5:00 Am tiang meithal thawng a dai kho lo. Ramong hlei kam ah ah minuntes 40 chung kahnak zong a um” tiah Minpya peng Hluttaw palai U Hla Thein Aung nih a chim.
AA lei in chimrelnak nawlngeitu Khaing Thukha zong nih September 30 in kahnak a um tiah a chim ve. Tatmadaw lei nih kah ngol chungnak thlakhat kan tuah lai tiah thawng an thanh nain, ralhrang cawlcanghnak hmun cu ai tel lo tiah an thanh chih. AA cu rampi cozah nih ralhrang tiah a chiah hna ruang ah kahnak an ngol lonak a si tiah ruah a si.
Rakhine ramkulh hi COVID-19 zawtnak a karh ngaingai nak hmun a si i, hi lio caan ah ralkahnak a um lengmang rih mi ruangah mipi nih innle lo zaamtak in an um rih. Kum hnih chung raltuknak ruangah Rakhine ramkulh chungah minung 200,000 cu ralzaam dirhmun ah an phan.
Source: VOA
