CBN News, 20 Oct 2020: France ram Middle sianginn cachimtu, Samuel Patty cu a sianghngakchia hna sinah profet Mohammed cartoon a zohter hna ruangah Islamic pa pakhat nih a lu atan piak.
Hi lainawnnak duhlohnak langhter in le cachimtu Samuel Patty tuarpinak, freedom of expression runvennak langhter in France khuapi dangdang, Paris khuapi pin ah Lyon, Toulouse, Strasbourg, Nantes, Marseille, Lille leh Bordeaux hna ah sandah piah a si i Paris Place, de la Republique i mipi pumhnak ah prime minister Jean Castex zong ai tel.
Kum 47 mi Samuel Patty nih hin tuthla hramthawk lei ah khan a sianghngakchia pawl freedom of speech kong a cawnpiaknak ah profet Mohammed cartoon a zohter hna, hihi Muslim tampi nih an doh.
Muslim pawl nih an doh ningah Mohammed zukțuh phundang in cartoon ah ser hi Islamic biaknak zeirello ah an puh. Hi ruangah kan hnungzarh cawn ninga ni ah khan Patty hi Paris khuapi lengi sianginn lengah kum 18 mi Islamic pa Abdoulakh nih a zuanhnawh i a hngawng a tan.
Patty thattu hi Islamic ralhrang, Russia ram Chechen mi a si tiah theih a si, Patty a thah tlawmpal ah Palik nih meithal in an kah ve colh. Hi lainawnnak ah ai telhmoihmi minung 11 palik nih an tlaih.
Khuapi dangdang i mipi lamzawhmi hna nih cachimtu Patty tuarpinak ah “Je suis enseignant” (i am a teacher) = “cachimtu ka si” timi cațial nganmi an i ken hna i mivialte nih freedom of speech an ngeihnak le France ram cu biaknak zalawnnak ram a sinak an langhter.
Aluancia kum 5 i profet Mohammed cartoon chuahmi duhlo ruangah Islamic ralhrang hna nih Charlie Hebdo magazine office an rak luhhnawh kong zong athar in chimphuan țhan a si.
Education Minister Jean-Michel Blanquer nih a chimning ah “mipi hna nan lungrual ah cun france ram nih democracy ral a ngeihmi paoh teih peng an silai, France ram sianginn cachimtu hna nih nan dirkamh an herh” tiah a chim.
France ram Muslim tam u zong nih hi bantuk lainawnnak an dohnak an langhter ve, biaknak uhțanh ruangi lainawnnak cu zeitik hmanh ah kan cohlan kho lailo tiah an chim.
Vawleicung Muslim bu nganbik, ram 57 i komhnak Organization of Islamic Coorperation zongnih Samuel Patty thahning ah an lungtlin lonak an langhter ve, zei hngauhchan hmanh va siseh, ralhrang cawlcanghnak hrimhrim kan cohlang kho loh tiah poi an tinak an langhter.
Thaizing cawn nithumni ah France ram puipi ah Samuel Patty tuarpinak langhter a silai.
CBN News
