CBN News, 17 Nov 2020: Armenia ram top intelligent agent, National Security Service (NSS) hna nih an ram Prime Minister Nikol Pashinyan thah timtu ah an puh mi, NSS director hlun Arthur Vanetsyan an tlaih.
NSS hna nih Arthur Vanetsyan an tlaih lio ah, amah bawmchan tu ah ruahmi midang 2 zong an tlaih chih. Arthur hi NSS director a ttuan lio, kum 2018-2019 karlak ah khan midang amah dirpitu hna he Prime Minister thahnak ding khuakhannak an ngei tiah NSS nih an langhter.
NSS nih Prime Minister thah timtu ah an puh i an tlaihmi hna hi, NSS Director hlun, Arthur Vanetsyan, Republican party hruaitu hlun Vahram Baghdasaryan le Volunteer Ashot Minasyan hna an si.
Armenia Prime Minister Nikol Pashinyan nih hin nai hrawng hrawng ah buainak tampi a ngei, an ram le Azerbaijian ram nih ramri kong an buainak ah Russia hna he kahdaihnak hnatlaknak an ngei, hi kahdaih hnatlaknak hi Armenia ram mipi hna nih an duh lo, hi ruangah Prime Minister Nikol Pashinyan hi awlawk chawngin a um lio a si.
Kahdaihnak hnatlaknak an tuahmi ah hin Nagorno-Karabakh hmun hi Azerbaijan ram chung ah khumh ding a si, hi ruangah Armenia mipi nih lungtlin lonak langhter in buainak an chuahpi. Nagorno-Karakbakh pengkulh hi Armenia le Azarbaijan nih caan saupi an rak i cuh cangmi a si.
Hi kong he pehtlai in tukum september thla thawk khan buai hram aa thawk than i ram pahnih karlak ah i kahdohnak a chuak than, hi ruangah civil mi tampi nih harnak an ton i an inn le lo an chuahtak.
Nagorno-Karabakh hmun hi UN nih Azarbaijan ram ah a cohlan pimi a si, a sinain hi hmun i khua a sami hi Armenia miphun an si.
Russia nih Nagorno-Karabakh pengkulh ah buainak fak a chuahlo nakding ah Russia ralkap 2,000 a rak chiah cang.
CBN News
