CBN News, 01 Oct 2020 : US president thimnak dingah Candidate pahnih Donald Trump le Joe Bide hna cu nizan zing (US caan i cawn nihnihni zan) ah khan hmaitonh i debate hmaisa bik an ngei, an bia zong a fak. Hi debate hi kum zeimawzat US Presidential Debate ngeih cangmi ah pumpak i huatnak langhter tamnak le debate huahalo bik a si lai tiah chimcaih a si.
Cleveland, Ohio ah minute 90 chung debate an ngeihnak ah hin Candidate pahnih (Trump le Joe) hna hi Covid-19 pulhrai kong, White supremacy, US khuapi kakip i duhlonak langhternak le buaibannak le economy kong ah a ruahnak an chim i asinain tlamtling i bia chim kho lo in an bia an i tan piak peng pin ah bia dawhcahlo an hman a tam ngai.
Trump le Biden debate nak hruaitu Fox News media Anchor Chris Wallace nih candidate pahnih, Trump le Biden cu bia an chim lio ah bia alnak a um peng ruangah a ho paoh bia i tan piak lo dingin a chimh hna.
Joe Biden nih President Trump cu ‘Clown'(nihchuak saihthiam) tiah dai dingin a auh chih i America nih President a ngeih cangmi vialte lak ah president chiakha bik na si tiah a phomh chih. Biden nih Trump cu ‘hrawkhrawl chim hmang’, ‘racist’ tiah a auh pin ah ‘Putin uite’ tiah a auh i President Trump nih Joe Biden fapa cu rithaisi a tawngmi a sinak kong a phuan ve.
US ram Covid-19 pulhrai kongah Biden nih Trump cozah thithruaining cu fak ngai in a sawi piak, minung ting 2 lengnih pulhrai an i thihpi lio ah Trump nih Lockdown phawih i Economy hawn than a duhnak cu sawipiak in “a lungfim (smart) zawk zawk lo ah cun midang tampi an thih chap lai” tiah a chim.Trump nih ‘Smart‘ timi biafang cu a sin ah hmanglo dingin a chimh cawlh ve.
Trump le Biden debate nak ah hin pumpak i huatnak bia le bia dawhcahlo theih ding a tam ngai, debate tlamtlinglo le debate huaha lo ah a ruattu mipi an tam.
Trump le Biden nih hin President i thim hlan, October thla chung ah debate voi 2 an ngei than lai, an mah pahnih pin ah Vice President candidate pahnih Mike Pence le Senator Kamala Harris hna zong debate tuah an si lai.
CBN News
