A tulio US president Donald Trump nih ai zuam cuahmah mi president tlinter thannak chunmang a loh ni cu thaizing kip January 6 ah US Capitol Hall ah tuah ding mi teitu thanhnak ah a si lai.
President Trump le a mithi lalang pawl cu 2020 US President thimnak result lingtelet in ser an timhnak ahhin a hnubik bochan ding cu Vice-president Mike Pence lawnglawng a tang cang. Trump le a mi hna nih US rampi chung biacaih zung ah thimfung diklo konglam (case) 61 cu an chuahpi nain hmunkhat lawnglawng ah an tei.
A hnubik Georgia ramkulh vuanci Brad Raffensperger sin ah President Trump nih phone in a chawnh i President nih Georgia a tei khawnak ding ah ai duh mi thimfung 11,780 kha a lam um ning in kawlpiak ding ah a fialnak phone call record aw nih Trump a mualphoh ngaingai.
A tutiang ah Trump le a mi hna nih an i zuam mi President Trump tlinter thannak kong ah kong an chuahpi bik mi thimfung dik lo cu Social Media ah a phunphun in an chim nain tehte taktak chuahpi khawh a si lo tikah biacaihzung ah an sung lengmang fawn ti a si.
Cu ca ah zeiti tuah awk hngalh lo ah Trump le a phu hna ih a ralai mi Senate le Congress tonnak ah Trump tlinthannak zuam than dawh an si. Hi tonnak hi Joe Biden President tlinnak ding ah phunglut ni a si fawn lai.
Senate ah chairman a si mi Mike Pence nih fek tein hrenh mi US ramkulh pawl nih an rak kuat mi thimfung kuang cu a hun lai i, a kam ah a thu mi minung pahnih kha a relter hna lai. Cu tikah a hodah duhlo a um tiah biahalnak a tuah telai.
Hi lio caan ah Trump le a mi hna nih “kan duh lo” tiah an chim telai tiah ruahdamh a si. Hi tikah Hluttaw pahnih fonh biacaihnak ah duh lo tu hna le an duh lonak kong kha suimilam 2 chung hrawng an caih lai. Hi Congress pahnih fonh ahhin Republicans lei in palai 140 an um i, hi 140 nih Trump lei tang in duh lonak kut an thlir hmanh ah Democrats lei in palai 50 nih Trump an dirpi a herh telai. Cu ca ah, a caan paam men in bia elnak suimilam 2 chung a um telai tiah ruah a si.
Source: January 3 chuak the econmist mekazin capar Trump Vs Democracy timi kha a tawinak in leh a si.
