US rampi thimnak ah thlakhat telawng aa duh cangmi caan ah President Donald Trump cu COVID-19 in a zaw ruangmang. Trump hi President tuan kholo lak in zaw thai sehlaw teh timi biahalnak zong a hong um lengmang.
Mee Kawlnak Ca ah Zeitin A Tuah Lai?
October 1 ahkhan President Trump cu COVID-19 Postive a si tiah theih a si ca ah ni 10 chung a dang tein um hau a hung si. Cu ca ah October 15 ah tuah dingin timh lamh a si mi avoihnihnak US Presidential Debate ahhin ai tel kho fangfang a si te kho tiah an zumh.
Florida ah tuah ding tiah rak khanmi October 2 Mee Kawl khualtlawnnak cu an rak leet. An khiah cangmi khualtlawnnak vialte zong ni an thawn mi an um i, an leet mi zong a um tiah theih a si.
Thimnak Ai Thawn Kho Maw?
President Donald Trump cu COVID-19 mizaw a si cang ca ah hi caan chung ah lengchuak in mipi sin mee halnak a tuah kho ti lailo. Cu ca ah Mee Kawlnak ca ah cun a hnursuan ngai ko lai tiah ruah a si. Cu ti a si ah Thimnak tah thawn khawh a si maw? Zeibantuk nicaan hna ah dah US rampi President thimnak ni thawn khawh asi timi biahalnak a um kho.
US ram phunghram pi ahhin President thimnak cu kumli voikhat November a zarhkhatnak cawn nihnih ni ah tuah siseh tiah a um. Tukum ah cun November 3 ah a tla. Hi ni thawn le thawn lo hi President nih khiah nak nawl a ngei lo. US Congress palai hna lawng nih an khiah khawh mi a si.
Thimnak ni thawn nak ca ah biakhiahnak hi US ram Hluttaw pahnih ning tein mitam u hnatlaknak in thawn a hau. Cucu thil har ngai a si. Congress ah Democrats an tam i, Senate ah Republicans an tam ca ah duhmi ai zawng kho lai timi zumh a har ti as i.
Cu leng ah Thimnak ni thawn nak ca ah Phunghram remh a hau. Phunghrampi remh hi a har taktak mi a si. Federal Hluttaw pahnih hnatlaknak asiloah, State Hluttaw 2/3 hnatlak leng ah State dihlak 3/4 hnatlaknak lawng in remh khawh a si.
President nih a rian tuan kho ti hlah sehlaw teh?
A tu tiang ah President Trump zawtnak cu a puanlau deuh lawng a si rih tiah an chim. President Trump hi riantuan kholo lak in dam lo sehlaw zeitin an tuah lai timi cu US ram phunghram ah hitihin a tial.
US ram Phunghrampi remhmi No.25 ningin, President nih Vice-president cu tuanvo a pek khawh. A tu ningin President dam thailo sehlaw Vice-president Mike Pence hi tuanvo pek a si hnga. Amah cu Caankarlak President a si hnga. Trump a dam tikah Trump nih President rian a tuan thanh khawh.
Hibantuk phung hi Ronald Reagan le President George W. Bush chan lio zong ahkhan a rak um bal ti a si. President nih riantuan kho lo tiang in ka zaw cang a ti ahcun US rampi cozah le Vice-President nih thawngthanhnak an tuah lai i, Vice President Mike Pence cu caankarlak President a si lai.
Vice-President Mike Pence zong dam loin a riantuan kho hlah sehlaw President phung ningin Congress ah Chairman a simi Nancy Pelosi a si. A mah cu Democrats a si. Asinain, hi tiangtiang thil a can ahcun Phung le lam ning in i alnak a chuak kho mi a si tiah thiamsang hna nih an chim. Nancy Pelosi nih President tuan a duh lo ahcun Republican palai chungin zumhtlak upa pakhat thim a si kho tiah phung le phai a um.
Trump hi thimnak ah lut kho hlah sehlaw Presidential Candidate a hodah a si kho?
Party pakhat nih president i cuh ding ah a thim cangmi pa cu a ruang pakhat khat ruang ah thimnak a luh khawh lo a si ahcun; Mike Pence hi caankarlak President a si lai nain Trump hmunhma ah direct in Presidential Candidatea si colh lo. US ramchung Republicans Komiti (RNC) meeting tuah in President candidate an thim lai. Cu chung ah a tulio Vice President Mike Pence zong aa tel kho thiamthiam.
Mee an pek ciami teh zeitindah an tuah lai?
Thiamsang hna nih an thinphan mi cu hibantuk ah buainak a chuak kho ti a si. President Trump hi a riantuan kholo lak in damlo thai sehlaw, President i cuh kho lo lakin damlo sehlaw, Republicans nih Presidential candiate thar an chuahpi lai ca ah a sing nuai in a hlankan mee a thlat tu pawl nih an thlak cia mi mee kha pakpalawng a si hnga ti a si.
Zei a si hmanh ah atulio ah US President Trump cu COVID-19 zawtnak ai chawnhbarh ruang ah siizung ah chiah le thlawp cuahmah a si. Vawleicung hruaitu tampi hna nih dam hram ko seh tiah an thlacamnak tete zong twitter ah hmuh khawh a si.
Trump Damnak Ding Ca ah Vawleicung Ram Hruaitu Cheukhat Thlacamnak | CBN
