COVID-19 zawtrai ai chawnhbarh mi US President Donald Trump cu zawt zual a si te ding in ruahdamh a si. A nunnak ca hmanh ah tihnung ngai a si kho tiah ruahdamh a si. Zeiruang ah tiah cun, a kum, a rih (weight), le pa a si ruangah hin a zawt a zual kho tiah ruahdamh a si.
President Donald Trump hi kum 74 a si cang i, a thau luan mi cazin ah khumh a si. Pe 6 le zung 3 a sang, Body Mass Index 30.5 a si ca ah hin tihnung dirhmun a phan kho mi a si tiah ruahdamh a si.
“A tulio ahhin cun President Donald Trump le a nupi Melania cu an dam piang ngai ko rih. Virus thiannak ding ca ah i dinhnak hi White House i an inn ah a si lai” tiah Trump i a doctor nih a chim. Cu pin ah Doctor Sean Conley nih, “President hi a dam lai i, president rian a tuannak ah dawnkhan tu um loin rian a pek kho te ko lai tiah ka zumh” tiah a chimchap.
Trump hi a rih zan pound 244 hrawng a si. Asinain, pe 6 le zung 6 a si ca ah thau luan cazin ah khumh a si. Cu pin ah a kum a upa cang i, a nunnak ca ah lungrethei a si kho tiah ruah a si. US ram ahhin kum upa deuh pawl COVID-19 ruangah an siizung phak hi cu hlan nakin alet nga a karh ti a si. Mithi zuatuak ahhin kum upa pawl an thih ning 90% a tam deuh.
US ram COVID-19 mithi minung 10 ah 8 hi kum 65 cung tar an si tiah American Centre pawl nih an thanh. A ngan a dam mi kum 74 upa hna hmanh hi an sining ai dang kho tiah siibawi thiamsang hna nih an chim.
Trump Damlonak Nih US Thimnak A Donh Lai Maw?
US ram ah kum upa mi hna le lung zawtnak a ngei mi hna relh lo in mitam u cu Virus an i chawnh kho lo tiah Trump nih a chim hnu zarhkhat ah Trump hi Virus ai chawnh a si. US ram pi thimnak ni 32 lawng aa duh cang fawn. US ram pi thimnak cungah zeitluk in dah a hnursuan lai timi cu ruah awk a um ngaingai mi ah a cang.
Trump hi a dang tein chiah (Q) a si lai ca ah mipi sinah mee kawlnak le mibu sernak a tuah kho lai lo. A ralaimi zarh hnih chungah tuah dingmi Avoihnihnak US Presidential Debate zong tuah ding le ding lo ai bengbai. Trump nih US ram ah COVID-19 zawtrai cung ah teinak nganpi kan hmuh tiah a rak chim mi cu a mah pumpak Virus a hun i chawnh tikah phundang piin a um than cang.
A voikhatnak debate hlan nihnih hrawng aa duh ah caan fatin Mask ai vuah lengmang mi Democrats Candidtate Joe Biden cu Trump nih a rak soi lengmang. Hi kong he pehtlai in White House ah biahalnak tampi a hung um i, Trump cung lungtlin lonak a karh ngaingai.
A tulio ah hngah bik mi cu avoihnihnak US Presidential Debate kong ah Trump a dam lonak kong hi a hung si. Thil fiangfai theih a si rih nain, Florida ramkulh Miami ah October 15 ah tuah dingin rak khan a si.
