US President thar ding Joe Biden chiatserh biakamnak tuah ni January thla 20 ah US ramchung states 50 in hriamnam tlaih in duhlo langhernak a chuak kho tiah FBI nih ralrinnak thawngthanh an tuah.
Hi ni ah US ram Hluttaw Ruun a si mi Capitol Hill ah buainak fak taktak a chuak kho tiah FBI nih an thanh. Cu ca ah a ralaimi January 20 ahcun Capitol Hill ah security chah taktak chiah ding ah an i tim ti a si.
A tulio US ram ah cun President Trump sualphawtnak a si mi Impeachment cu Congress ah hnatlaknak lak ding in Democrats lei nih an i tim tiah theih a si. President Trump cu rampi buainak a chuahter tu a si ca ah President si ding ai tlak lo tiah Vice President Mike Pence cu Democrats lei nih an forh. Asinain, Mike Pence nih a tuah duh lo ahcun Congress le Senate ah meethlak in biakhiahnak tuah khawh a si.
President thim thar mi Joe Biden le Kalama Harris hna cu US Congress ah biakamnak a tuah ding an si. A tulio COVID-19 zawtnak ruang ah Joe Biden nih Washington DC ah rat lo ding in US mipi cu thawngthanhnak zong a tuah cang.
President Trump cu Facebook le Twitter hna nih cathlah kho lo ding in an kham hnu ah thanhca zeihmanh a chuah ti lo.
December 2019 lio ahkhan President cuh ding ah a zuamcawh tu Joe Biden cu Ukraine cozah he an karlak ah chawlehnak kong he pehtlai in a thlithup hlathlainak a tuah ruang ah a sual tiah President sinak in thlak an timh i, US tuanbia ah Impeachment tuah mi President a pathumnak ah a cang.
Duhlonak langhter tu ding hna nih zeitindah an i timhlamh ning?
President Trump a duh tu hna nih Online chung in January 17 ni ah US ram pi khuapi kip ah hriamnam tlaih in duhlo langhternak kan tuah lai tiah ca an post mi a tam ngaingai ti a si. Cu pin ah January 20 zong ah Washington DC ah meithal he duhlonak langhter ding in timhlamhnak an ngei ti a si.
ABC thawngzamh le a dang thawngzamh pical hna nih FBI thawngthanh kong he an chim chih mi cu; US President Donald Trump hi president sinak in an thlak asiloah, Biakam Ni ah President sinak in an thlak sual ahcun State kip i a um mi Federal biacaihzung hna cu meithal he luhhnawh ding in khua an khang ti a si.
Cu ruang ah Januarty 16 in 20 tiang cu US ram ah khualipi pawl le Washington DC ah security an rengh ngaingi lai ti a si.
US ram President thimnak le buainak kong ah ralhran thapeknak a tuah tu pawl cu Social Media Company pawl nih website le network pawl an kawl cuahmah hna i an thah piak cuahmah lio hna si. Twitter zong ah account 70,000 hrawng an thah cang ti a si. Cu pin ah Facebook zong nih “mee fir hlah u” timi post pawl cu kan hloh piak hna lai tiah an chim.
US President Trump cu President elect Joe Biden chiatserh biakam ni ah ka kai lailo tiah a chim. Cu ca ah US tuanbia ah kum 150 hnu ah President pakhat nih Biakam Ni a kai lo mi President a si lai.
Source: BBC
