Thil hi a kaphnih in zoh lengmang a hau.
Miphun party CNLD lei zong in zoh a hau
Ram pumpi ahcun NLD nih a tei ko lai caah Tlangcungmi umnak State ah tah?
Catialtu : Sui Hingz
Tlangcungmi (Taingyinta) pawl umnak kan zoh ahcun anmah le State cio ah anmah miphun party hi an thawng ngai cio hna. Mah le miphun identity, nawlngeihnak, covo, aw aan langhternak le federal democracy hmuh khawh ding ah an biapi ngai hna.
Kum 70 chung tlangcung mi hna nih dothlennak – Revolution hi an rak thawk i a ruang bik pathum ka hmuh khawh mi cu (i) ram sehnak ah political (naingnganzi) lei i lungfahnak le lungtling lonak, (ii) power-sharing a um lonak (federal si lonak) le (iii) i tluk lonak (inequality) ruang ah a si bik.
Tlangcungmi hriamtlai hna nih mahte in i tawlrel khawhnak (self-determination) le federalism kong ah cabuai cung ah bia thate in i ruah khawh lo ahcun ram chung ah zeitik hmanh ah daihnak a um kho lai lo tiah a langhter. Cucaah NLD hotu Pi Suu nih ‘The Union Peace Conference’ (21st Century Panglong Conference) hi a thawknak a si i tlangcung mi hriamtlai (EAOs) nih federal state ser hmasa hnu ah hriamtlai ti lo ding an duh, ralkap nih kahdaihnak ceasefire le hriam aap hmasa ding a duh tik ah a karlak ah NLD le CSO, le miphun party pawl hi an dir hmun a rak biapi nak a si.
Cucaah NLD nih cozah ser khawh a biapi bantuk in miphun party pawl zong nih hi rampi daihnak le federal sernak (peace initiatives) ah miphun a aiawh kho tu party an dir khawh zong a biapi.
Cucaah 2020 thimnak ah NLD zong CNLD zong nih a tawk fang in vote an i then hi kaphnih in zoh ahcun a herh caah party zoh lo in miding mifel le rian a tuan kho i ram le miphun dawtnak he a pum a pek kho taktak tu ding a “Minung” tu zoh in le thlacam bu thim hi a herh, cu hna pahnin fonh nih hmailei kan i tinhmi kan ram daihnak le federal democracy cu thaazaang fonh in (synergy) an ser khawh lai.
Ref : Sui Hingz facebook timeline
