Chin ramkulh,Paletwa peng Thron-Ai khuate ah kahdohnak zei hmanh um loin SAC nih vanlei in bomb a thlak caah tualchungmi 5 an thi i 11 nih hliam an tuar tiah theih a si.
Nizan May 21 zanlei slm 4:00 tluk ah Thron-Ai khua cu SAC nih vanlei in bomb lung 3 a thlak caah Nu 2 telh in minung 5 an thih leng ah 11 nih hliam an tuar hi a si.
“Nizan ah mi an i but cem nak bazar ah bomb a thlak hi a si.cu ka cun Aung-Balai khua mi Khumi miphun 2 telhin 5 an thi.Thron-Ai khua hi a cung le a tang in a um.a tu bomb a thlak nak hi zapi nih thil an cawk/zuar nak hmun a si” tiah Khuami mino pakhat nih Khonumthung ah a chim.
Bomb a thlak mi ruang ah Thron-Ai khua zapi inn pakhat le dawr pakhat a rawk i hliam a tuar mi hna hi an hliam a fak ngai tiah theih a si.
Bomb thlak nak in a nunnak a liam mi hna cu Balai khuachak in kum 32 a si mi Pu Maung Ting Naing, kum 67 a si mi Pu Aung Htun le Thron-Ai khuachak mi kum 17 a si mi Rakhine miphun Ma Sandar, kum 47 a si mi Daw Hla Khaing Oo le kum 33 a si mi Pu Aung Kyaw Ngunt hna an si hna.
Thron-Ai khuate cu a hlan ah SAC ralhraang nih fekthup in hmun an rak khuar nak a si i Byuha sakhaan zong a rak um.2023 December 4 ah khan Rakhine ralkap AA nih an rak laak mi a si.
Rakhine ralkap nih SAC sakhaan an laak hnu in cu khua he aa hlat tuk lo nak ah AA nih sakhaan an chiah tiah theih a si.Thron-Ai khuate cu inn dawng 100 tluk an um i Khumi Chin miphun le Rakhine miphun zatceo in khua an sak nak khua a si.
