Chin ramkulh,Paletwa peng,Taman-Thar khua i khuami nu pakhat telhin Chin mi 4 cu AA nih an tlaih hna hnu in thla hnih chung pehtlaih khawh an si tilo tiah theih a si.
Paletwa peng Taman-Thar ohsuh,Taman-Thar khua le Htingletwa khuami nu pakhat telhin minung 4 cu a luancia Aprl 22 ah khan Rakhine ralkap AA nih an rak tlaih hna hi a si.
“Tlaih a tongmi chungkhar hna nih hin tlaih a tongmi hna pehtlaih khawh nakding ah AA sin ah an hal peng hna nain AA lei nih kan thei lo an ti peng.an tlaih hna sinin nihin tiang pehtlaih khawh an si lo” tiah khuami pakhat nih Zalen ah a chim.
AA nih an tlaih i an kalpi mi hna cu Taman-Thar khua in Pu Ku Lung fapa Salai San Lin Aung, Htingletwa khua in Pu Kan Ku i fapa Salai Aung San Lin,Pu Aungpa fafa Salai Hla Htun Kyaw le Pi Hoih Yoh hna an si.
Tlaih a tongmi hna chungin Salai San Lin Aung i hringtu a nu cu a fapa kongah lungkuai ngai in a um tiah theih a si.
“A nu cu khua ah hin mihrut bantuk in a um cang.rawl zong a ei ti lo,nifatin a tap peng. A tu hi a ngandam nak zong a tha tuk tilo.ka fapa he ton ka duh ti lawng a chim peng” tiah khuami pakhat nih a chim chap.
A luancia May 17 zongah khan Paletwa peng Bawngwee khuate le bawngku khuate i tualchungmi minung 9 cu AA nih an tlaih hna i an kalpi hna.
