Chin ramkulh thlanglei Paletwa le Mindat peng hna ah Chungtlik zawtnak ruangah minung 14 an thi cang tiah Chin Health Organization – CHO nih June 16 ah an thanh.
A tutan chungtlik zawt nak hi minung pakhat le pakhat ichawnh khawh a si i zawtnak i chawnh in slm 2 in ni 5 karlak ah zawtnak a lang.cu zawtnak cu a caan um lio ah i thlop manh lo ah cun zatuak ah 30% in 50% tiang an thi kho i a caan luan hlan ah thlop manh ah cun 1% lawng an thi tiah theih a si.
Cu zawtnak cu Paletwa le Mindat ramri Daai hmunram ah a cang mi a si i a zaw mi le a thi mi hi an karh ngai tiah theih a si.
“Khua caan nih a hman lo,kan din mi ti zong a thianglo,sii-ai zong a um lo i cawk awk zong ah a um lo.ngakchia upa tilo an zaw viar” tiah Paletwa khuami pakhat nih Zalen ah a chim.
Cu zawtnak kong he pehtlai in CHO nih cun rawl tthing,meh tthing ei lo ding,eidin tirawl tho tlanh ter lo ding,hnuk ding lio ngakchia an si ah cun a nu hnuk pakhat lawng dinh ding. Pawngkal khawh in rawl ei lai,siam lai,chumh lai poah ah chahpiat he kut thiang tein tawl ding, zawt sual ah cun ngandamnak lei a thiam mi sin ah i zohter colh ding le Datsa haang din ding tiah an langhter.
Datsaa a um lo ah cun ti litre pakhat ah cini (Sugar) lakphak siam nak hailing leng 6 le cite leng cheu cawh in din ding tiah CHO nih cun a langhter.
