Chin ramkulh Paletwa peng chung ah SAC pakhat hmanh taang lo ding in kan doh hna hnu nihin January 14 ah kan i tinh mi a tling cang i Paletwa hmunram dihlak cu kan laak khawh cang tiah Rakhine ralkap AA nih tuzan January 14 zaan ah a thanh.
A phu in siseh pakhat hnih in siseh a tlizam mi an um pah caah Paletwa hmunram chung ummi zapi hna iralrin a herh tiah an thanh chih i a tli zam mi hna cu kan kawl hna i kan doh cuahmah lio hna an ti.
Rakhine le Paletwa peng chung Operation kalpi nak thlahnih a tlin ni 2024 January 13 zanlei slm 6:00 tluk ah Paletwa – Kyaukdaw ramri ah a um mi SAC Miwa Byuha sakhaan cu kan laak khawh hnu ah hriamnam tampi kan laak tiah an langhter.
Cu sakhaan cu aluancia 2020 February 4 in March 17 tiang ni 42 chung kan rak doh cang nain kan rak laak khawh lo mi a si i a tutan ah fak piin ni 4 chung kan doh hnu ah kan laak hi a si an ti.
Miwa Byuha sakhaan le Hnamada Byuha sakhaan laak a si hnu in Kyaukdaw peng chung um SAC hriamngan battalion a si mi ahmahtah 377 cu nihin January 14 zinglei slm 3:30 tluk ah le Yathetaung peng um Yesuchaung Byuha sakhaan cu nihin January 14 chun slm 12:30 tluk ah tlam tling tein kan laak khawh chih tiah an thanh.
Sakhaan laak hnu in a zaam mi hna cu kan dawi hna i nihin January 14 zanlei slm 2:40 tluk ah Maungdaw peng Maungsait peng in nitlak lei Kilometre 2.2 tluk aa hlat nak ah kan ton hna i kaphnih kar kahdohnak a chuah caah caam tlampal chung ah SAC minung 20 kan thah khawh hna i an hriamnam zong kan laak tiah an langhter chap.
January 12 zinglei slm 11:00 tluk zong ah SAC Linmuaitaung sakhaan cu kan laak i hriam tampi kan laak than tiah an langhter chih.
