Chin ramkulh Thlanglei Paletwa peng cu Arakan Army (AA) nih ukhruainak lei kalpi an timhmi cu a dikmi lamthluan a si lo tiah Chinland Cozah Chief Minister Pu Pa Thang nih a chim.
“AA nih Chin ramkulh Paletwa peng ah ukhruainak lei kalpi an timhmi hi a dikmi lamthluan a si lo, hihi tlangcung mi pakhat le pakhat kar ah i lungfahnak a chuahter te lai, hihi an tuah lo ah a tha bik, asinain kan chim cia bang ramkhel i tonnak lam in kal hmasa a si lai” tiah Chinland Cozah Chief Minister nih a chim.
Paletwa kongkau he pehtlai in Arakan Army AA/ULA le Chinland Council, Chinland cozah i ceihhmainak lamthluan in pehzulh ding a um tiah Chinland cozah Chief Minister nih a chim.
Paletwa ah miphun tam nih aa rem an ti ah cun humhimnak, thanchonak, ukhruainak lei kan kalpi lai tiah Arakan Army AA nih March 4 i Media he ton pumhnak an ngeihnak ah a chim.
Paletwa peng cu humhimnak, remdaihnak hna he ULA/AA uknak tangah chiah rih a si ko lai tiah ULA/AA chimnak nawlngeitu tu U Khaing Thu Kha nih thawngfianhnak ah cun a chim.
Arakan Army (AA) nih hin 1027 Operation chung ah Paletwa pengchung i ralhraang riahbuk hna cu pakhat hnu pakhat an doh i an laak i, 2024 Tangkhawng 14 ah ralhraang Battalion le an riahbuk dihlak pakhat zong tang sual lo in an laak dih i a tu bantuk in ukhruainak kalpi an i timh hi a si.
