National League for Democracy – NLD party nih ramkhel party sinak an rak sok a si cun cohlan dingin SAC cunglei nih a thlithup in nawl a pek hna tiah Naypyidaw thawnghram nih a chim kong BBC nih tuzing ah a tial.
SAC i ramkhel party hna Register tuahnak phunglam ningin NLD nih hin party sinak register an rak sok ti lo caah an party a thih hi a si.
Phungning tein cathanh (Statement) a chuak lo mi hi thawngpang hi SAC luban Min Aung Hlaing Tuluk ram a kal hlan ah a chuak mi a si i a tak in NLD nih register sok than ding cu a fawi lo tiah ramkhel lei thiam sang cheukhat nih an chim.
“NLD nih register an sok than la maw sok than lo timi cu Daw Aung Sang Su Kyi sinah aa hngat mi a si.” tiah ramkhel lei thiamsang pakhat nih a chim. Kan hnu te ah khan Naypyidaw i thong a tla lio mi NLD Chairman Daw Aung San Su Kyi le NLD hruaitu luban hna Naypyidaw ah tonnak an ngei tiah bia a rak chuak.
NLD party register kong, Daw Aung San Su Kyi le NLD luban hna an i tong timi kong ah BBC nih kan fehter kho lo tiah an langhter chih.
