2020 thimnak hnu ah thimnak phichuak le bia alnak a chuah ruang ah A Caan Thumnak Hluttaw meeting au loin A caan hnihnak Hluttaw (2016-2020 Hluttaw) auh ding ah forhfialnak a tuahtu an tampi ko nain, teinak a cotu NLD cozah lei in A Caan Thumnak Hluttaw (2021-24 Hluttaw) auh ding ah phunghram ning bantukin kan tuah lai tiah an thanh.
Thawng pehtlai relchap khawh asi| Thaizing Ah Pyituh Hluttaw Speaker Le Deputy Speaker An Thim Hna Lai|
NLD CEC chungtel Dr. Myo Nyunt nih a caan thumnak Hluttaw auh ding hi phunglam ning in kan tuah ko lai tiah a chim. Thimnak a dih hnu ni 90 chung ah Hluttaw meeting auh ding a si i, Hluttaw meeting kawh lonak ding ah halnak an tuah mi hi mipi thim mi le duh mi kha peklak (a-pe-a-zu) tuah an duh ruang ah namchan in thil an tuah a si tiah Dr. Myo Nyunt nih a chimchap.
“Thimnak adih hnu ni 90 chung ah Hluttaw meeting kawh ding tiah phung ah a um. A tu ah meeting kawh lo ding in halnak an tuah mi hi phung lonh in an tuah mi a si” tiah a chim.
Naihrawng ah Tatmadaw lei nih 2008 phunghram pi hi kan kilven kan upat lai i, phung upat lo ahcun kan hrawh lai tiah General Min Aung Hlaing nih a chim mi bia cu Media le mibu hna nih a chim duh nak siloin, an duhnak biafang in an kuaihpiak mi a si tiah Tatmadaw lei in nizaan (January 30) ahkhan thanhca an chuah.
2020 thimnak hnu ah cozah thar sernak le riantuannak timhlamh lio ah ramkhel mei a ttal ngaingai ti khawh a si. Hi kong he pehtlai in dai tein biaruah in siamremh ding ah Uk le US telh in Myanmar ramkomh ah a um mi Embassy zung pawl nih thanhca an chuah.
Source: Mizzima
