Ramkomh uknak lei ah cozha upa sinak a tlai kho lo mi Daw Aung San Suukyi ca ah NDL cozah nih a dang tein an ser piak mi State Counsellor hmunhma cu a ra laimi NLD cozah chan ah kan peh than lai tiah NLD chimrelnak nawlngeitu Dr. Zaw Myint Maung nih nihin January 24 ah a chim.
“State Counsellor hmunhma kan chiah mi ruang ah Kawlram ah zeidah a hnursuan mi a um tiah cun a fiang ko. A phi cu a herh ruang ah kan ser mi a si. Cu ca ah kan peh ko lai” tiah Dr. Zaw Myint Maung nih NLD CEC thawngfianhnak an tuah mi ah a chim.
2008 Phunghrampi hrenkawnnak ruang ah Daw Aung San Suukyi cu President sinak a co kho lo i, 2016 Kawl ramkomh hluttaw a voihnihnak ah State Counsellor hmunhma cu an rak thawk i, Daw Aung San Suukyi cu cozah lutlai dirhmun pakhat a hung si.
Aung San Suu Kyi nih State Counselor dirhmun a pehzulh rih ko a si ahcun State Counsellor phunglam phun thum hrawng hi a thlenremh a hau lai tiah phunglam lei thiamsang hna nih an chim.
Hi phunglam hi 2016 ah an rak ser mi a si i, Daw Aung San Suu Kyi nih hi hmunhma a lak than a si ahcun phunglam chung ah ai tel mi “2015 kum multiparty thimnak ah” timi le “avoihnihnak hluttaw ah” ti mi biafang hna cu a remh a hau lai tiah an chim.
Hi phung remhnak ca ah hin, Avoithumnak Hluttaw (thim thar mi) an auh hnu lawng ah remh khawh a si telai. Hluttaw upa chungtel 50% hnatlaknak in remh khawh a si lai. Hi phung hi ralkap lei nih cun 2008 phunghram he ai kalh tiah an rak doh bal.
Source: BBC
