Nizaan April 10 ah Kalaymyo peng Natchawng khuachung mipi umnak inn cu SAC ralkap nih an khangh leng ah nihin April 11 zinglei ah an khangh than
Sagaing ramthen Kalaymyo chaklei meng 15 tluk aa hlatnak Natchawng khuachung mipi umnak inn hna cu SAC ralkap nih nihin April 11, zinglei suimilam 8:00 in an khangthan tiah khuami pakhat nih a chim.
“Kan khua Natchawng hi nizaan April 10, zaanlei suimilam 5:00 hrawng ah voikhat an khangh cang, inn 7 hrawng a kaang. Nihin zinglei suimilam 8:00 hrawngah SAC ralkap nih khuachung inn an khanghthan, Natchawng khuachung vanlei cu meikhu in a muidih ko, a tu ah SAC ralkap motor ruun 39 nih khuachung cu an hrawh” tiah Natchawng khuami pakhat nih cun a chim.
SAC ralkap hna cu Natchawng khua thlanglei Tayakung le chaklei Yangyiawng khua ah umhmun an khuar caah khuachung mipi hna cu ralzaam dirhmun in kan umnak thla 3 hrawng a si cang tiah a chim.
Natchawng khua mizapi hna cu ramlak ah ralzaam dirhmun in khua an saknak thlathum hrawng a si cang caah, eiding , hnipuan le sii-ai kong ah tlamtling in a umlo caah harsatnak an tong tiah theih a si.
Mizzima
