A tulio US President Trump cu White House in a chuahtak nak ding ah suimilam 24 hmanh a tang ti lo. US ram White House cu Trump nih ai thim mi President ruahnak petu le a minung pawl zong White House an chuahtak dih cang hna i, White House thianhnak ah White House staff members pawl an i manh lo ngai lio a si an ti.
White House ah a lutchuak lengmang mi Conservative upa pawl hna zong President Trump nih President a tuan chung ah a tuah khawh mi pawl lawmhsaihnak chim loin an tlau dih cang. (McClatchu D.C Bureau News)
Vice President Mike Pence cu President biakamnak tuah ni ah ka kir than lai tiah President Trump ai thawhnak ding vanlawng Marine One vanlawng dirnak Andrew Airport tiang a va kal tiah Mike Pence Secretary nih a chim. President Trump cu US tuanbia ah President thar biakamnak ah ai tel duh lomi US President a palinak a si lai i, Florida ramkulh Palm Beach a inn ah a tlung colh lai tiah theih a si.
Vice President Mike Pence tu hi inn tlunnak ngei lo dirhmun a si an ti. A nih hin Vice President inn a rak rat hlan ahhin Indiana Ramkulh Govenor kum riat a rak tuan i, khoika ah dah a tlun lai timi hi theih a si rih lo. (TRIB LIVE/AP)
President Trump a rian in a tum ahhin US ram ah President a tuan hlan nakin rianngeilo an tam deuh. Cheuthum cheukhat hrawng an tam deuh ti a si. COVID-19 in mithi sing 4 an phan. Asinain, President Trump hi 2024 ah cuh than ai tim ko rua ti a si i, tha a petu US mipi nuai 74 ca ah 2024 hi i biatak ngai dawh a si. (Bloomberg)
US Capitol Hill buainak a dih hnu zong ah Trump hi mi tampi nih an dirpi rih. Trump hi US ram ah riantuan mipi hna ruang tein thathnemnak a serpiak khotu President a si tiah an zumh peng ko rih. Republican lei in 64% zatuak nih tehte ngaingai a um lo nain, mee fir ruang ah US thimnak in Trump a sung tiah an zumh ko rih. (Los Angle Times)
Washington DC ahhin a hlan bantuk khan President biakamnak ni ah thapetu a si mi, Hollywood lemcang fidi fitlaw hna, Zatlang ah minthang hna, zungmawi minthang hna nih tloksabur in President lawmhpinak an tuah tawn mi cu daidup an um ko cang. COVID-19 ruang ah Lockdown an tuah lawng siloin, hmunkip ah ramveng ralkap nih mi an kham hna. National Guard ralkap minung 20000 leng nih Washington DC an cong.
Nithum Ni chunlai ah US biacaih bawi John Robert nih Joe Biden cu Capitol Hill hnulei ah phunglut in President a si tiah bia a kamter telai. Asinain, US ramkulh 50 ningin zungmawi minthang hna nih Parafe Across America tiah Online in hlasaknak an tuah telai. (AFP)
Washington DC ah Security a la mi National Guard ralkap chung lila in minung 10 lengkai cu Righ Wing extremist pawl he pehtlaihnak an ngei ti ruang ah an rian in an phuah cang hna. Hihi FBI nih a hlat hna i a tlaih mi hna an si. (AP)
A tu hnu US ram ah President himnak tuanvo a latu US Secret Service chungtel pawl hi tih a nung taktak mi rian an tuan cang lai tiah The Atlantic Journal nih a tial ve.
President Trump nih nihnih ni ah minutes 20 hrawng a biachimnak cu US mipi thlahnak ca ah a chim mi a si i, Biden nih teinak a hmuh mi a cohlannak kong le a ralai mi cozah an lamtluang in an vantha ko seh timi bia a chim. Asinain, bia a chim chung minutes 20 chung ah Joe Biden min voikhat hmanh a telh lo. (Wall Street Journal)
President Trump cu White House in a chuah bak in phaisa kong ah vun i hawhnak mithah tual a phan tinak a si cang. (The New York Times).
