Uk ram cu vawleicung ah a hmasabik COVID khamsii kum 16 in a cunglei chunh ding ah a cohlan i chunh hramthawk colh ai tim a si tiah theih a si.
Relchap: UK Nih COVID Khamsii Pfizer A Cohlan, Hmaizarh Cun Chunh Hram An Thawk Lai
Pfizer le BioNTech hna nih an tuah mi COVID-19 khamsii dur 800,000 cu December 3 ahkhan UK nih lampi ah a phan cang, hmaizarh chung ah chunh hram kan thawk lai tiah Parliament zong ah thanhnak an tuah.
Cu a si ah mizei dah chunh hmasa an si lai le COVID khamsii ciocio ah a zeidah ai dang hlei timi halnak a um kho. UK ram ah hin COVID-19 nih harnak a pek khawh mi tiah a phu in a tthen hna i phu kua an si.
A pakhatnak ah chunh hmasabik ding ah ruah mi hna cu Tar zohkhenhnak ah a phan mi tar hna le a zohkhenh tu Nurse hna an si.
A phu hnihnak ah kum 80 a tling cang mi hna le siizung siikhan ah riantuantu hna an si. A phu thumnak ah kum 75 cung upa cang mi hna an si lai i, kum 70 cung hi a phu linak an chiah an si ve.
Cu hnu ah Kum 60 cung, kum 55 cung le kum 50 cung tiah a phuphu in chunh an si telai tiah UK ngandamnak zung nih cun an thanh.
Tutan COVID khamsii Pfizer timi hi COVID-19 zawtnak in a zaw i siizung in a ttum cang mi mizaw 99% cu a voihnihnak i chawnhbarhnak in a khamh khawh hna lai ti a si. Pfizer Company nih cun 95% tiang a khamh khawh hna lai tiah an chim ve.
Asinain, Pfizer Khamsii hi a kik ngaingai mi dur ah chiah in kuatchanh ding a si ruang ah kuatchanhnak le mipi sin phakter khawhnak a caan a rau kho tiah theih a si.
UK ram ahhin Oxford Sianghleiruun nih an tuah mi Astrazenecca timi COVID khamsii zong hi Christmas hlan ah UK ngandamnak nawlngeitu hna nih cohlan khawh ding ah zumh a si.
Relchap: COVID Khamsii Ngahnak Ding Ah Zeitluk Dah Aa Duh Cang?
COVID Khamsii Ciocio Zeidah An I Dang?
Atulio ah COVID khamsii chuah ai zuam cuahmah mi hna hi hmaisuang bik phu 4 an si. Pakhatnak ah Oxford Sianghleiruun nih an i zuam cuahmah mi Astrazenecca a si.
Astrazenecca: Viral Vector timi phun a si i, virus pakhat kha a ningcang an thleng hnu ah minung taksa chunh in cu virus nih COVID zawtnak kham a si. Hi Khamsii hi voihnih chunh ding a si lai i, a tutiang ah 62-90% tluk zawtnak a kham khawh lai tiah zumh a si.
Astrazenecca hi kuatchanh tik le a fimtawlnak ca ah normal tikhal kuang bantukin kuatchanh khawh a si i kuatchanh a fawi bik ah a cang. A man zong a fawi bik ah a cang. Voikhat chunh ah $4 lawng a si.
Mordena: Mordena hi US ram Boston ah a um mi zawt khamsii chuah tu Company pakhat a si. A nih hi RNA (Virus pumchung ah a um mi sining “code” an thlen mi) phun a si. Hi khamsii hi a hlan ah voikhat chunh ding ah an rak chim nain BBC nih cun voihnih chunh ding ah a langhter ve. Mordena hi 95% tluk cu zawtnak a kham khawh lai ti a si.
Mordena hi kuatchanh tikah fimtawlnak ca ah tikhal kuang -20 degree celcius chiah lawng ah kuatchanh khawh a si lai ti a si. Thlaruk chung i chiah khawh a si ti a si. COVID khamsii ah a man a fak bik zong a si. $33 a si.
Pfizer: Pfizer hi US Company Pfizer le Germany BioNTech Company i bawm in an tuah mi a si. A nih zong hi RNA phun a si ve. Voihnih tiang chunh ding in zumh a si. 95% cu zawt a khamh khawh lai tiah ruah a si.
Pfizer hi kuatchanh a har ngaingai mi a si. -70 degree cesius tikhalkuang ah chiah in kuatchanh hau a si. A man tu cu a hung i deng deuh. $20 in cawk khawh asi telai.
Gamaleya (Sputnik V): Hi khamsii hi Russia company a simi The Gamaleya National Center of Epidemiology and Microbiology nih an chuah mi a si. Hneksaknak dot thumnak an tuah lio a si tiah theih a si. A nih hi Astrazenecca bantuk in Virual Vector phun a si i, voihnih chunh a si ve lai.
Hi sii nih COVID hi 92% tiang a kham khawh lai tiah an zumh. Kuatchanhnak ca ah sii kuatchanhnak tikhal kuang sawhsawh in umkal pi khawh a si fawn lai ti a si. Russia President Putin nih cun a rauh hlan ah 2 million in kan chuah lai tiah a thanh ve cang. Aman cu $10 si telai tiah ruah a si.
Nihin vawleicung ah COVID zawtrai a chuah hnu kumkhat ah vawleicung khamsii chuahtu phu hna le ramkip cozah hna biatak thlak te zuamnak thawngin COVID-19 khamsii a chuak cang ti khawh a si.
COVID Khamsii kong ah relchap:
UK Nih COVID Khamsii Pfizer A Cohlan, Hmaizarh Cun Chunh Hram An Thawk Lai
Vawleipi Nih Ruahchan Cio Mi COVID-19 Khamsii Pfizer Cu Zeidah A si?
