Yangon khua ah a ummi Dingdi Family nih Mai Sui Hlei Tial ngaihchiat hrawmpi nak ca ah phaisa sing sarih an bulh hna. Hi kong cu Dingdi Family facebook page ah an tarlangh cang. Dingdi Famili hi Chin hlasakthiam Pi Sung Tin Par le a hawi le nih an ngeihmi a si.
Dingdi Dream nih Facebook page ah cun, “chungkhar sifah harsat ruangah ramdang ah rian a va tuan mi Mai Sui Hlei TIal (Kum 21) ruah lopi a thihnak le a ruak tlunpi nak le a chuahsemnak Thantlang khua ah a phak ningcang cu a hmutu mit ah thinlung a ngeimi paoh nih ngaichiat pi a si. Dingdi dream chungkhar zong nih Mai Sui Hlei Tial chungkhar ngaihchiat kan hrawmpi hna” tiah an tial.
Cu ca cu Hlasakthiam Pi Sung Tin Par nih a share i, “Ka nau, Mai Sui Hlei Tial, Dingdi Dream chungkhar nih tantak mi chungkhar ngaichiat kan hrawmpi hna” tiah a tial.
Mai Sui Hlei Tial cu Malaysia ram Kuala Lumpur ah September 29 ahkhan Inndot riat in a rak tla i a nunnak a liam.
