2020 kum cu COVID-19 zawtnak rai pi he dih ai zaal cuahmah ve. COVID caan har lakah Asia ram ah thil zeimawzat an chuak. Cu thil cang cheukhat chung ah Asia ram lawng siloin Vawleipi tiang lau lengmang in a tuahtu hmanthlak cheukhat hna cu a tanglei bang hin an si hna.
24 February ah India Ram Delhi Khualipi ah Biaknak buainak tuksum a chuak
Hi hmanthlak hi India ram khualipi Delhi ah a cang mi a si. India ram ah Hindu le Muslim biaknak karlak buainak fak ngaignai in a chuah lio February 24 ah lam lai ah Muslim mino pakhat minung lo loin an velh lio hmanthlak a si. Hi buainak hi India ram cozah nih a chuah mi Citizenship Acts thar duhlonak langhternak ruang ah a chuak mi a si.
16 June- South Korea le North Korea remdaihnak a rawh Ni
Korea ram hnih karlak ah a um mi North Korea vawlei ah a um mi ram hnih pehtlaihnak inn hi remdaihnak hmelchunh tiah auh lengmang mi a si. Asinain, June thla ahcun vutcaam ah aa cang. North Korea ram tuarnak celh lo ah South Korea ah a zaam lengmang mi North Korea mipi a tam ngaingai lio a si i, cu elhnialnak ruang ah cu innpi cu North Korea nih vutcaam ah i cang lakin a rak hrawh.
10 August- Hong Kong Media Mirum Jimmy Lai An Tlaih
Hong Kong ah sianghngakchia a dirpi tu mirum lak ah minthang le paraltha hi Jimmy Lai lawng a si tiah an chim tawn mi a si. An i bochna ngaingai mi mirum pakhat a si. Hong Kong Democracy kong chimphuannak ah a nganbik Media ngeitu a si i, Apple Daily newspaper timi a dirhtu a si. August 10 ah palik 200 leng nih Apple Daily newspaper zung ah an luhhnawh i an tlaih. Mirum Jimmy Lai hi a tu ah biacaih cuahmah lio a si i, nunchunh thong aa huah kho ti a si. A mah hi Security Law in taza an cuainak a si.
10 August- Thailand Ram ah mi nih tuah a ngamh lo bik mi tuah ngamnak thawngthanh
Thailand ram hi Siangpahrang uknak in ai hruai peng rih mi an si. Siangpahrang chungkhar duhlonak kong hi kakhat tezong chim an ngamh lo i, an duh lo, an hrial hrimhrim mi zong a si. Asinain, 10 August ah cun Siangpahrang uknak phung zohthannak kan tuah piak u tiah fak piin duhlonak langhternak cathanh cu sianghleiruun sianghngakchia nu Panusaya Sithijirawattanakul nih cathanh a hun rel tikah vawleipi a cul. Hi cathanh chung ah Siangpahrang ukphung kong ah biahalnak le remhpiak ding tlang 10 a rel chih. Kan hnu thla ahkhan a mah le activists pawl hna cu taza an cuai hna i, thong kum 15 thlak khawh an si tiah theih asi.
15 August- Vawleipi Khuaruah A Har Tertu Wuhan Khua ah minung a thong in Tilionak
Kan theih bang Tuluk ram Wuhan khua cu COVID-19 ai thawknak khuapi a si. Wuhan khua cu a thlathla in lockdown chiah a si hnu 15 August ah cun minung athong thong i bu in tilionak an tuahnak hmanthlak cu Social Media ah a chuah tikah vawleipi a hninh. Hi Tilionak ah mask zong an i bunh lo i, minung zong an i ttih ti lo.
COVID cases a tambiknak hmun in zero ah a tla. Tuluk ram thawngzamh pakhat Global Times nih cun a strict ngai mi COVID zulhphung zulhnak phichuak a si tiah tlang a tar piak hna.
16 October Philippine Cozah Cung ah an mipi thin a linh tuknak hmanthlak
Ramkhel thongtla Reina Mae Nasino cu a kut thir cikcin he a thla lawng a si rih mi a fano ruak hmai ah a khuk aa bil i a tap. Palik a za in hun zulh mi thongtla nu nih a thla lawng a si rih mi fanote a hun ttahnak hmanthlak cu Media ah a hun langh tikah Philippines mipi an thin a phawh hna. Reina Mae Nasino hi kum 23 a si i, thong chung ah fano a ngei. A fano te cu thongchung in an chuah i, a fa he um ding ah cozah a rak hal hna nain a hlawh a rak tling lo. Cu hnu ah a fate cu a zaw i, a zual lei a panh lengmang hnu ah a thi. A fa he tonnak caan a hal lengmang hna nain nawl an pe lo. A hnubik tonnak cu October 16 ahkhan a si i, a ruak he lawng nufa hna an i tong kho. Cu tikah fano ngei thongtla nu hna an covo kong ah Philippines mipi an thin a khenh hna lawng siloin, vawleipi a rak hnintu hmanthlak a si.
30 October- Taiwan ah Ngeikhat thitumhnak phung an fehter Ni
30 October ahkhan Taiwan ram ah ngeikhat thitumhak phung an fehter. Hi ni ah ralkap chung ah ngeikhat thitumhnak a tuah mi khuah tamlak te thitumh thuam he hmuh khawh an si. Ralkap chung in khuah 188 hna cu voikhat te ah thitumhnak an tuah hna. Hi hmanthlak nih vawlei a cul i, ngeikhat thitumhnak hmelchunh a si mi chuncha thantar nih Asia ram a hun phak ve nak langhternak a si.
27 November- India ah Leithuang pawl duhlo Langhternak ah hmanthlak minthang
27 November ahkhan India ram ah Leithuang pawl nih duhlo langhternak an tuah. Hi ni ah zei hriamnam hmanh aa ken lomi leithuang putar pakhat ah palik pakhat nih fung in tuk a timhnak hmanthlak cu Social Media ah a langh tikah India mipi an thin a khenh hna. Hi kong he pehtlai in cozah ser tu BJP partu cu ralchanh party pawl nih fak ngai in an mawhchiat hna i, biahalnak tampi an tong.
