Euthanasia tiah auh mi thlop khawh tilo tiang in zawtnak a tuar cang mi hna nih nun an huam tilo tikah sii fimthiam bawmhnak in thihter bawmhnak nawl ti mi phung cu New Zealand ram ah phung an ser i, mipi sin ah duh le duhlo halnak vote an thlakter hna tikah mi tam-u nih “duh” tiah an thlak.
Hi phungser mi hlawhtlin nak kong he pehtlai in hi phung hluhchuahnak khawh nak ca ah a cawlcang mi phu hna nih cun, “mi zawnruahnak ca ah teinak hlawhlin ni” a si tiah an chim cio.
New Zealand ram mipi sin ah vote thlaknak an tuah tikah minung 65.2% nih cun End of Life Choice Act cu phungthar fehter awk ah siseh tiah an duhnak vote an thlak ti a si.
Hi phung ning in thlopbul khawh a si tilo i, thlaruk chung lawng a nung cang ding minung hna nih thih an duh ahcun sii hmang in thihnak ding ca ah lam i thim khawhnak nawl pek a si lai. Sii hmang in thih i thim tikah siibawi pahnih theihpi nak he thihnak thim nak phung ningin thih khawh a si lai ti a si.
Asinain hi phung a doh tu hna nih cun hi phung hi nunnak kilvennak ca ah baunak a ngei tiah an doh ve. Hi phung hi a ra laimi November thla thawk cun hi phung hi a nung cang lai tiah theih a si.
Hi phungsernak le fehternak, mipi duhthimnak laknak ding kong ahhin New Zealand ram ah kum tampi rau in Parliament chung ah an rak i al cang mi a si. Asinain, hi phung hi zeidang phung he ai dannak cu mipi sin ah vote lak in vote petu mipi 50% nih an duh ahcun fehter ding ti a si.
New Zealand ram ah Prime Minister Kate Laurell Ardern le ralchanh party hruaitu Judith Collins zong nih an duh veve mi a si ruang ah mipi nih an lungtlin a fawi ngai lai tiah ruah a si nain a rak duh lo mi an rak tampi ve. Cu ruang ah Euthanasia-Free NZ timi campaign pakhat zong an thawk ti a si.
Hi bantuk thih thimnak khawhnak phung hi vawleicung ah Belgium, Canada, Columbia, Luxemberg le Netherlands ram hna zong ah hman an si. US ram zong ahhin State cheukhat ah cun hman a si i, Australia ram Victoria ramkulh zong ah hman a si ve.
Source: BBC
