CBN News, 06 Oct 2020 : Zarhpini zingka ah khan New Zealand ram kangh hram aa thawk i khuasaknak inn zeimaw zat a kangh pin ah minung 100 renglo hmun him lei ah thial cuahmah an si.
New Zealand fire emergency agency nih an langhter ningah nizan 05 Oct tiangah khan ram hectare 4,600 (acre 11,366) tluk a kang cang, minung 100 renglo nih an inn le lo an chuahtak cang tiah an langhter.
Zarhpini zingka ah khan tlang pang in mei kangh hram aa thawk i thli a tamtuk ruangah kangmei zuallei a panh chin chin, New Zealand thlanglei khual tlawng (Tourish) pawl i funtomnak hmun, Lake Ohau khua zong a kangh chih.
Lake Ohau khua inn 60 in 70 karlak a kang dih, hi kangmei ruangah a thimi le hliam a tuarmi an um theih a si rih lo tiah Radio New Zealand nih a langhter.
Thli a tamtuk ruangah duhning in mei phalh khawh a silo tiah Fire Emergency nih an langhter i tuchun 06 Oct ah hin ramkang liomi 50% hrawng cu phalh khawh an i zumh.
New Zealand ram ah hin kangmei a rak chuak theu tawn nain Lake Ohau khua bel a kangh bal theih a si lo.
CBN News
