Myanmar rammi a zaa leng Thailand palik nih an tlaih hna
Thailand ram chungah nifatin ngawt in rian kawl ding in a raami Myanmar rammi tampi an um i Thailand cozah nih phungning loin a lutmi an tlaih lengmang hna. May 14 nikhat chung lawngah tlaih a tongmi Myanmar rammi 300 hrawng an si i May thla thok in a tutiang tlaih a tongmi 1,300 leng an si cang i phungning loin mi a phurtu 4 zong an tlaih chih hna.
Thailand ram ah rian kawl ding in a kalmi cu nifatin in Thailand ram chungah luh lengmang a si i May 14 nikhat chung lawngah phungning loin a lutmi Myanmar rammi 300 hrawng tlaih an tong i May thla cheu tiangah 1,300 leng le puaisa 14 tlaih an si.
Atu bantuk in ramri ah phungning loin a lutmi Myanmar rammi hna cu nifatin ngawt in tlaih an si lioah Myanmar rammi pawl a ting leng in rian an ṭuannak Samut Sakhon peng chung an umnak hmun tiang phungning loin a lutmi Myanmar rammi 30-40 kar tlaih an si tiah U Moe Kyo nih a chim.
Thailand cozah nih Myanmar-Thai ramri hlei in ram hnih hnatlaknak minthut MOU thawng in phungning tein rianṭuantu pawl auh hramthok a si cang caah atu bantuk phungning loin luhnak pawl a zor deuh cang lai tiah ruahdamh a si.
