SAC bawizik Min Aung Hlaing nih a tu lio a ton cuahmah mi Myanmar ram buaibai nak kong tawlrel nak ding ah a hman mi thimnak tuah ding le dothlennak ralkap hna nih hiram chia in ramkhel ningin a phi kawl ding timi aa tinh mi cu a tlam a tling lo tiah CNF/A Vice Chairman Pu Sui Khar nih a chim.
Myanmar ram ah a cang cuahmah mi buaibai nak pawl in chuahkhawhnak ding ah thimnak tuah le ton biaruahnak in a lam kawl aa timh kong, cu tin aa timh mi caah innchungkhar cazin a laak nain a tling mi cazin a laak khawh lo kong a chim.
Min Aung Hlaing nih tuah aa timh mi thimnak cu kan co hlang lo tiin ram cheukhat nih a tu tein an chim cang kong a chim chih.
“Nihin Min Aung Hlaing nih tuah aa timh mi thimnak nih hin kan ram buaibainak a daih ter khawh lo pin ah a buai ter chihchin khawh” tiah Pu Sui Khar nih cun a chim.
Min Aung Hlaing nih hin a tu ton lio mi ram buaibainak kong he pehtlai in a bik in hriamtlai phu he ton biaruah nak tuah ding a duh kong, ramkhel cu ramkhel ningin a lam kawl a herh tiah Min Aung Hlaing nih a chim kong zong Pu Sui Khar nih a chim chih.
“Min Aung Hlaing hmuh ning ah ramkhel buaibainak timi hi hramhram in uknak an laak mi duh lo ruangah hriamtlai in dohtlennak tuah mi lawng hi a si tiin a ruah mi kan hmuh khawh. Cu caah hriam chia in ramkhel in a lam kawl ding tiah a chim hi a si.a tlangpi in chim ah cun 2008 phunghram tang ah biaruah dingin a duh bia a si.” a ti.
A tu lio a chuak mi ramkhel buaibainak hi SAC caah suttung bang a si mi 2008 phunghrampi ruangah a si tiah a chm rih.
CNF/A telhin NUG le K3C nih cun ramkhel Min Aung Hlaing he ton biaruahnak ding kong ah dirhmun fekfuan kan ngei tiah Pu Sui Khar nih cun achim.
K3C timi cu Karen Karen National Union – KNU, Kachin Independence Organization – KIO, Karen National Progressive Party – KNPP le Chin National Front – CNF/A hna an si hna.
Min Aung Hlaing i tonnak kong a chim mi kong ah dothlennak phu hna dir hmun cu hramhram ralkap uknak a hram in bongh i donghter ding.2008 phunghrampi hrawh in democracy dirh khawh nak ding ah upadi thar tial ding.Ralkap nih ramkhel chung ah i sawhkalh ve lo in mizapi uknak tang ah a um ding,vun i lehthal kar ah tluk ruan nak a um ding le ram dang hna hmai ah tonnak ngeih ding te hna hi an si.
