CBN News, 20 Oct 2020: Myanmar nih a tu fiscal year 2019 – 2020 chung ah facang tun 2.5 million tonne ramdang ah a zuar, hi facang zuarnak in phaisa hmuhmi ngunkhuai Myanmar cozah Revenue sin i liammi phaisa zat cu US$794.3 million a si tiah Myanmar Rice Federation (MRF) nih an thanh.
Kan hnungkum fiscal year 2018-2019 ah khan ramdang i facang zuarnak in Revenue ah ngunkhuai a lutmi phaisa zat cu US$570 million a si.
Hmai kum fiscal year 2020-2021 zong ah tu kum fiscal year i facang ramdang ah an pekmi zat țhiamțhiam an pek khawh rih a zumhnak MRF General Secretary U Lu Maw Myint Maung nih a chim.
“Atu kum fiscal year ah hin ramdang ah facang tun 2.5 million hrawng kan pek cuahmah i hmai kum 2020-2020 fiscal year zong ah a tlawmbik tun 2.5 million pek khawh kan i zuam, a tutiang ah cun facang kan pekchangh ning lam a tluang ngai rih” tiah a chim.
Tukum fiscal year 2019-2020 chung ah Myanmar nih Vawleicung ram 60 ah facang supply a tuah, China ram hi Myanmar facang caw tambiktu ram a si.
Ram cheukhat Philipine, Malaysia, Madagascar, Poland, Guinea, Belgium, Senegal, Indonesia, Netherland le UK hna hi tukum fical year chung ah Myanmar nih facang a supply tammi ram an si.
CBN News
