Myanmar ramkomh cu COVID-19 zawtrai nih a phak nak March 23 thawk in nihin December 1 tiang ah ramchung COVID-19 mizaw 90,000 tiang an phan cang.
Myanmar ramchung ah COVID-19 ai thawk ka in thlariat chung ah minung 90,000 lengkai an phan cang i December 1 ah cun Tuluk ram nakin COVID-19 mizaw an tam deuh cang tiah theih a si.
Myanmar ramkomh hi South East Asia ramchung ah COVID-19 mizaw a tambik ram thumnak a si cang. ASEAN ramchung ah Indonesia le Philippine ram hi a tambik an si tiah theih a si.
Myanmar ram cu vawleicung COVID-19 mizaw a tambik ram 68 a si cang. Rampi cozah nih COVID-19 ralrinnak ca ah November 28 in December 15 tiang a caan a sauh tthan.
A luancia September thla thawk khan Myanmar ramkomh chung ah COVID-19 mizaw karhnak hrahhnih nak aa thawk i a tu lio ah mizaw 18,000 hrawng an si cang tiah MoHS nih a thanh.
Nizaan nai November 30 ahkhan Yangon University kum 100 tlinnak puai kong ah minung luhchuahnak a tamtuk i, soiselnak a chuak ngai te. Cu ruang ah Yangon University hmai ah luhchuahnak zong an khar cang tiah theih asi. December 1 hi Yangon University kum 100 tlinnak puai a si. Asinain, Online lawng in an tuah.
Source: BBC
