Beijing (CBN News) : China nih nitlak lei ram hna pin ah US le a hawi India, Australia le Japan hna cu Myanmar tlerhkhanh lo dingin warning a pek hna, Myanmar ram caah thatnak a chuahpi lailo, hmailei an ramkhel thatlo nak a chuak kho tiah an langhter.
an langhter chap ningah “Myanmar ramchung le ramleng in Ralkap dohtu mipi hna nih caan tha ah an i lak i China mawhchiatnak bia chawkvak an zamh, Myanmar chawleh pimi ram ngan bik China sin in Myanmar cu i zukphiak dingin le ramri kham dingin China duhlonak an langhter”
Ralkap nih Myanmar cozah uknak an chuh hnu ah Yangon i Chinese Embassy hmai ah nichiar duhlonak langhter in mipi an i bu.
Myanmar i Chinese Embassador a tuanmi Chen Hai nih a chimning ah “atu Myanmar ram i a cangmi buaibannak hi China nih hmuh a duh hrimhrim lomi a si” Beijing khuapi tiangin Myanmar mi nih doh-aunak tuah in lam an zawh.
Myanmar ralkap nih thazang hmangi cozah an chuhning hi China zongnih mawhchiatnak a langhter cang “ram kip nih mawhchiat awk a si”.
Myanmar ralkap tanpi nak ah Myanmar ramchung internet phihpiak ding in China nih technician thiamsang pawl Myanmar ah a kuat hna tiah China an puhnak hi “zei hmanh a si loh, puhnak nihchuak a si” tiah Chen nih a chim.
kan hnung zarh i Ralkap nih China bawmhnak a cohlan tiah an puhnak cu Ralkap lei nih puhnak diklo a si, ramchung internet umtuning vilkawi dingin China bawmhnak kan herh lo, Ralkap lei nih kan thiamtuk mi a si ve ko tiah an langhter.
Ni chiar in China, Russia le US embassy hmai ah mipi an i bu, duhlonak an langhter, tuzarh chung ah mino tampi nih Singapore Embassy hmai ah doh-aunak an tuah fawn.
China Embassy hmai ah “China!!! zangfahnak tein Myanmar mipi dirpi ve, Ralkap silo in” tiah catar an i ken hna, US Embassy hmai ah “US ralkap kan herh” timi catar i ken in US an koh auh.
Singapore hi Myanmar ram ah Phaisa invesment tuah tam biktu ram a si, a changtu ah China hi a si.
CBN News
